Krisis sa Senado
Nganong wala may ganahan nga mopuli ni Senate President Pro Tempore Ping Lacson pagka chairperson sa Senate Blue Ribbon Committee? Tungod ba sa kangilngig nga mangimbestigar ni Lacson nga bisan kinsay mopuli mabisto nga dili kamao o dili sama katakos?
O tungod ba kay duha ray kapilian sa komitiba kon padayunon ang imbestigasyon sa flood control projects: Una, kinahanglan nga dili sila mohingalan og dugang mga senador (labi na kon maapil nang taga majority bloc) kay peligro nga; ikaduha, mahimong pabilo sa kudeta nga mopalagpot ni Senate Presidente Tito Sotto?
* * *
Kon determinado si Sotto sa pagpabilin sa puwesto, iyang hunungon ang ilang imbestigasyon. Sama sa gihimo sa House Infrastructure Committee pipila ka semana ang nilabay. Nga nitugyan sa tanang nahipos nilang mga ebidensiya ngadto sa Independent Commission for Infrastructure (ICI).
Kay kon ipadayon ang imbestigasyon sa komitiba, manganlan gyod si Senador Mark Villar. Kay maoy hawod sa Department of Public Works and Highways (DPWH) sa pagsulbong sa kinawatay sa flood control projects sa 2016. Ug mao nay pabilo nga mapulihan si Sotto ni Senate Minority Leader Alan Peter Cayetano.
* * *
Kon dili siya kaduphan sa majority bloc, dili maglisod si Mark Villar sa pagbalitok ngadto sa minority bloc. Nga nagkinahanglan ra og upat ka senador aron pag-ilog sa liderato para sa naghinam-hinam nang si Alan Peter Cayetano.
Sunod ni Mark Villar, segurong mobiya ni Sotto silang Camille Villar (kay manghod man siyang Mark), Senador Pia Cayetano (kay wala man sila mag-away ni Alan) ug Senador JV Ejercito (kay igsuon man niya si Senador Jinggoy Estrada).
* * *
Pero kon palabihon ni Sotto ang pagpabilin nga ikatulong kinatas-an nga opisyal sa nasud, mapilde ang kaligdong sa institusyon sa Senado. Tulisukon sila sa mga magbubuhis kon palabihon ang pamolitika kay sa pagsilot sa labing dagkong kawatan ug pagbawi sa ilang kinawat.
Isalikway sa katawhan ang Senado walay kalainan sa House: Dunay giduphan sa labing dakong eskandalo sa atong panahon. Mosamot pagduda kon padayong tagoan ang imbestigasyon sa ICI gikan sa publiko. Nga daotang balita para sa administrasyon ni Presidente Ferdinand Marcos Jr.: Kon magduda nang katawhan sa kamatinud-anon sa mga imbestigasyon, mas masuk-anon nang mosunod nga mga protesta.
* * *
- Latest
