Linog sa Davao

Pagpamalandong sa Malangkubong Kaayohan

Kusog man gyud ang linog sa Mindanao. Nakatungha ko kaniadto didto.

 Usa to ko buntagon nga klase. Presko pa sa akong panumdoman diin may moving exam mi kaniadto sa Davao del Sur National High School.

Gipa- identify namo ang different parts of microscope.

Apan sa maong exam nitay-og ang yuta. Maayo gani kay diha ko duol sa pultahan ug nakadagan dayon ako sa open field sa maong tunghaan.

Ang maong pagtay-og nakapabuka sa akong mga mata kun unsa gyud diay ka gamhanan ang kinaiyahan kun itandi natong mga tawo.

Dinhi masukod ang atong pagkatawo ingon man ang atong pagtuo. Kini tungod kay mahimong tay-ogon ang yuta nga atong gitumban apan dili matay-og ang atong gituohan.

 Sa mga hitabo nga sama niini angayan kitang magmatngon ug magbinantayon sa kanunay sanglit ang kamatuoran nagtudlo man kanato nga ang kalibutan magkausab.

Ang mga yuta molinog ug molihok. Matud pa sa PHIVOLCS nga ato na lang dawaton ang buhing kamatuoran nga kita ingon man ang atong nasud, nagtungtong man sa pacific ring of fire. Ug ang maong singsing sa kalayo dinhi sa pacifico aktibo ug naglihok na karong mga panahona.

Sa laktod nga pagkasulti, nisulod na usab kita sa laing cycle sa kausaban.

Kun unsay atong dangatan niini, bugtong Dios lamang ang nasayud niini.Hinuon kita padayon sa gihapon diha sa atong pakigbisog ug paglihok segun sa gipaabot gikan kanato.

Mamalandong kita ug mag-ampo ug sa laing bahin, atong hinumdoman nga human sa bisan unsang katagman,a ng Dios dunay giandam alang kanatong tanan.