Mga bangag nga hulga sa kinabuhi

Minstras dili pa ulahi ang tanan, kinahanglan mobiya na ang mga tawo nga nagpuyo sa mga sinkholes didto sa Northern Cebu kay kong magdumili sila dako ang posibilidad nga mao usab kini ang mobitad nila sa tataw nga kamatayon.

Dili ni panghulga kay mao gyud kini ang kamatuoran kong dili sila mosanong sa panawagan sa kagamhanan. Base sa gipagawas nga data sa Mines and Geosciences Bureau MGB sa Department of Environment and Natural Resources adunay 70 ka mga sinkholes ang ilang natala sukad mitay-og ang 6.9 magnitude nga linog sa amihanang Sugbo.

Adunay 40 ka sinkholes sa lungsod sa San Remegio, 16 sa Bogo, walo sa Daanbantayan ug duna pay mga vito sa halos tanang lungsod sa Northern Cebu.

Ug dili pa makaseguro ang MGB sa giladmon sa mga sinkholes ug posibleng modaghan pa kini kay nagsige pa man og lihok ang yuta tungod sa mga aftershocks.

Seryoso ang MGB sa ilang rekomendasyon nga papahawaan na sa mga tawo ang dapit diin mitumaw ang mga sinkholes kay posibleng mahugno ang dakong bahin sa yuta nga molamoy sa kabalayan sa mga tawo nga nagpuyo sa mga dapit. Kong huna-hunaon lang daan makapanglimbawot na sa balhibo ang posibleng mahitabo kong magpasagad ang mga tawo.

Aron segurado nga walay mahitabong pagmahay molihok na usab ang mga ahensya sa kagamhanan aron wala nay kinabuhi nga makalas.

Tinuod nga dobleng kalbaryo ang nahiaguman sa mga tawo nga apektado sa linog.

Nangaguba na ang ilang mga balay ug nangapikas ang mga yuta nga maoy ilang panginabuhian, ug karon dili na usab makabalik sa ilang pinoy-anan o sa yuta nga gitarokan kaniadto.

Kong gikinahanglan nga magbutang og pulis ug militar sa dapit ila kanang himoon kay kong luagan gud magsalig man ang mga tawo ug makalimot sa peligro nga naghuwat kanila.

Dili nato matugkad ang mga panghitabo karon nga daw giayag og maayo ang mga tawo. Kaniadto kong motay-og ang linog mahuwasan ra man dayon apan karon milanat naman og duha ka semana tangkod karong adlawa o tunga buwan.

Mora’g pirme gaginhawa ang yuta nga daw buot molamoy sa mga tawo.

Mas maayo ang bagyo kay dunay forecast apan ang linog surprisa pirme ang iyang pag abot, busa kanunay kitang mangandam.

Gani daghan ang walay tulganay tungod sa kalisang nga basin manuktok na usab ang linog sa atong pinuy-anan ug kong matulog tulog madayonan na hinuon simbako kay nadat-ogan na sa nahugno nga parte sa balay.

Bisan gani ang mga experto maglisod sa pagtugkad sa nahitabo karon, duna man silay pagpasabot apan taphaw ra kong atong paminawon.

Bugtong mahitabo nato mao ang pagpangandam ug labaw sa tanan ang pag ampo sa sa Ginoo kay Siya ang labing gamhanan sa tanan. Siya ang manalipod sa katawhan sa paghulog sa bangag sa kamatayon.