Unaha ang tabang

Sa kahimtang karon sa Northern Cebu human sa makusog nga linog kaniadtong Septiyembre 30, 2025, ang labing gikinahanglan mao ang tinud-anay nga panaghiusa ug dali nga aksiyon, dili pamolitika.

Ang mga biktima nanginahanglan og pagkaon, tubig, tambal, ug kasigurohan.

Ug ang paghisgot kung kinsa ang una o ulahi nga mitabang, ilabina kung adunay politikal nga tuno, dili makatabang sa pagbangon sa komunidad nga naapektohan sa kalamidad.

Si Cebu Provincial Board Member Tining Martinez, sa iyang diskurso atubangan sa hunta, mipasangil nga mora’g wala ang presensiya sa kagamhanan sa lalawigan sa unang adlaw sa relief response.

Apan klaro nga si Gobernadora Pamela Baricuatro personal nga mitunga sa mga lugar nga naigo sa linog sayong buntag human sa katalagman.

Ang maong aksiyon usa ka ebidensya sa tinuod nga pagserbisyo.

Hinuon, matud ni Martinez nga na-misinterpret lamang siya sa uban ug nga wala niya batikosa ang pag-response sa kagamhanang probinsiyal.

Ato usab nga masabtan si Martinez gumikan kay ang iyang lugar maoy usa sa grabe nga naapektohan sa maong katalagman.

Apan kung gusto ni Martinez nga hapsay ug dali ang pag-abot sa mga hinabang sa mga biktima sa linog, angay nga mismo siya ang nakigkoordinar sa Kapitolyo, ilabina sa gobernador, imbes nga moreklamo.

Ang pagtinabangay sa tanang lebel sa gobiyerno mao ang yawi sa epektibong relief operations.

Ug alang sa mga politiko, kinahanglan nga ipadaplin una nila ang pamolitika ug ipasubay ang ilang mga lakang sa tinuod nga panginahanglan sa katawhan.

Sa panahon sa krisis, angay nga isibog ang pulitika ug ang serbisyo publiko ang ipasentro.

Ang mga biktima sa Northern Cebu dili angay mahimong collateral damage sa politikal nga panagbangi.

Tabang una. Unya na  kanang politika.