Laing ekonomikanhong pamotbot

Namahayag si Presidente Ferdinand Marcos, Jr. sa iyang pakigpulong sa Philippine Development Forum (PDF) 2025, nga andam na ang Pilipinas motadlas (transition) ngadto sa pagka-upper middle-income country status.  Apan ang World Bank mismo namahayag nga madugay-dugay pa ang pagsaka sa Pilipinas ngadto sa upper middle-income status.  Basin ang gipasabot sa presidente nga dinhi sa Pilipinas, ang dato mosamot kadato ug ang pobre mosamot ka-pobre.  Makapahinumdum sa komedya bahin sa mga bampira nga nagkanayon, “Ang dato nga bampira, mopalit og presko’ng dugo; ang ang ordinaryo’ng bampira, mopalit ug dinugoan; samtang ang pobre’ng bampira, mangayo lang tawon og ininit tubig nga tusloban sa nakaplagan niya'ng napkin.”  Pagkatoytoy!

Natay-og ang pangisip

Palambuon sa Department of Health ang pag-institutionalize sa disaster management sa sektor sa panglawas aron maseguro ang dali ug mas coordinated nga mental health response sa panahon sa mga katalagman. Gihingusgan ang maong intervention tungod kay naobserbahan nga human sa katalagman, sama sa linog, adunay mga biktima nga magpunay og hinoktok ug mataranta tungod sa nerbiyos.  Matud pa sa akong amigo, “Mailhan nimo kon natay-og na lakip ang pangisip sa biktima kay, inay magpasalamat sa ayuda, masuko na man hinoon kay sardinas ra ang iyang nadawat.”  Madahaan!

 Basta modangat lang sa sabakan

Bisan sa makusog nga linog nga mitay-og didto sa Manay, Davao Oriental, aduna gihapoy managtiayon nga wala magpadala sa kahadlok ug mipadayon sa ilang seremonyas sa kaminyoon, didto sa Tailongod, Davao del Norte ug kini ipahigayon didto na lang sa gawas sa simbahan.  Tinuod gyud diay nga kon gugma na ang magsugo, walay katalagman nga makababag.  Makapahinumdum sa balak-komedya nga nagkanayon, “Bisan ang unos nag-alintabo, bisan ang yuta nag-alboruto, ug bisan ang sapa nag-ulbo-ulbo, ang tanan dili ko igsapayan ug dili ko kahadlokan, basta mahidangat lang ako sa imong sabakan.”  Fezteleern!

paglambo sa relihiyon

Mipasalig ang nasudno’ng kagamhanan nga ipahiuli niini ang mga nangaguba nga simbahan sa Cebu gumikan sa nahitabo’ng linog kay giila man ang maong mga simbahan nga dili-mahulipan nga simbolo sa pagtoo, pagkatawo ug pagkamaayo mo-lalik sa mga Pilipino.  Mabatyagan nga ang mga gihinganlan nga simbahan nga tabangan nahisakop lamang Katoliko Romano.    Dili ba kaha kini mahasupak sa doktrina sa “separation of church and state” nga nalatid sa Konstitusyon?  Ginaingon baya nga, “Mas molambo ang relihiyon sa tumang kapulti, kon walay kagamhanan nga mag-apil-apil o motabang niini.”  Muleeng!

 May’pag gipakumkom

Tungod sa alegasyon sa kurapsyon, gipahunong na ni DPWH Secretary Vince Dizon ang tanan’g  road reblocking projects sa ahensya.  Ang pagpunay og repair sa mga kalsada bisan kon maayo pa ang kahimtang nakapalagot na sa katawhan.  Daghan ang labaw’ng gikinahanglan sama sa mga eskwelahan ug mga dalan ug tulay paingon sa kabukiran ang mas angayan pundohan. Makapahinumdom sa akong inahan nga sa dihang nasayod siya kon unsa kadako ang bayad sa catering services alang sa iyang birthday, sa dakong kaanugon miingon nga, “Kanang inyong gibayad sa cater, may’pag inyo na lang na gipakumkom nako.”  Ateerr!