Dili siya maoy bida
Ang nagsunod nga mga resignasyon nilang Baguio City Benjamin Magalong isip special adviser sa Independent Commission for Infrastructure (ICI) ug Senador Panfilo Lacson isip chairperson sa Senate Blue Ribbon Committee nagpakita og dili maayong mga timaan:
Gawasnon ang imbestigasyon sa Department of Public Works and Highways (DPWH) ug ICI sa kinawatay sa flood control projects gawas lang kon maglambigit na sa mas tag-as nga mga opisyal sa administrasyon; ug
Mahimong makapadayon ang imbestigasyon sa Senado ni bisan kinsang gipasanginlan sa eskandalo gawas lang kon daghan nang mga senador ang manganlan.
* * *
Tungod sa negatibong mga reaksiyon sa nagkalainlaing sektor nga niisip nilang Magalong ug Lacson nga takos nga makahipos og mga ebidensiya pag-ila ug pagsilot sa labing dagkong kawatan:
Gibakwi sa Malakanyang nga walay kalapasan sa balaod nga nahimo si Magalong ug nga walay tuyo si Presidente Ferdinand Marcos Jr. sa pagtangtang niya gikan sa ICI; ug
Gipasabot na sa mga senador nga sakripisyo ang gihimo ni Lacson aron sa pag-preserbar sa liderato ni Senate President Tito Sotto atubangan sa hulga sa pipila ka sakop sa pagbiya sa majority bloc.
* * *
Ambot unsa kabug-at ang pasidaan sa Catholic Bishops Conference of the Philippines (CBCP) ug ubang mga tigpasiugda sa Trillion Peso March niadtong Septiyembre 21 ug gitakdang mohimo og mas lapad nga protesta karong Nobyembre 30 nga ang pag-ilis sa liderato sa Senado isipon nga pagsabotahe sa nagpadayong mga imbestigasyon.
Kon mawagtang si Lacson ug kon padayong tagoan gikan sa publiko ang imbestigasyon sa ICI, ambot kanus-a kutob ang agwanta sa katawhan nga masuk-anong nag-apura og hustisya.
* * *
Ang pagpangayo sa presidente og dugang lugway, kay kinahanglang palig-unong mga kaso batok sa mga gipasanginlan, maisip nga taphaw atubangan sa kumpisal sa mga kawatan ug mga ebidensiya sa ilang kawat.
Kon nagtuo si Marcos Jr. nga bilib ang katawhan sa pagbisto sa eskandalo sa flood control projects sa iyang State of the Nation Address (SONA) ug busa magpaabot ra kanus-a siya ganahang mosilot sa mga responsable, sayop siya. Ang pagkalumos sa katawhan sa baha maoy pabilo sa ilang kasuko. Ug determinado ang katawhan sa pagsilot sa mga responsable. Bisan ug labi na kon ang ebidensiya maglambigit sa presidente.
* * *
- Latest
