EDITORYAL- Problema sa trapiko

Nagkaproblema karonang paghatud sa mga hinabang para sa mga biktima sa linog didto sa aminahang Sugbu tungod sa traffic tungod sa kadaghan na sa mga sakyanan nga padung didto.

Ang mga sakyanan nga nagdala og mga hinabang napuno sa normal nga bul-og sa trapiko didto sa ordinaryong mga adlaw, karon, nag convoy ang mga sakyanan klase-klaseng gidak-on nga nagdala og mga hinabang para sa mga biktima.

Apil na niini ang sa gobiyerno gikan sa probinsya sa Sugbu ug sa mga local government units nga mitabang. Apan duha lang ka mga dalan ang pwedeng maagian padung ngadto, ang coastal road sa silangan via Danao City ug ang coastal road sa kasadpan via Balamban.

Tungod ani, si Gobernadora Pamela Baricuatro miawhag sa tanan nga gustong motabang ilabi na ang mga pribadong indibidwal ug mga organisasyon nga i-centralized nalang ang pagpadala sa hinabang.

Posibleng ang iyang gipasabot nga dili na kinahanglang ibiyahe pa nila kini padung sa north kondili ipasa nalang kini ngadto sa kapitolyo o ba kaha sa mga LGUs ug sa DSWD aron maoy modala niini ngadto sa mga biktima.

Apan bisan pa ani, dili malikayan nga dili gyud kini tumanon ilabi na sa mga indibidwal nga gustong motabang, kay ang uban ani nila adunay mga paryente sa norte nga gusto nilang hatdan og hinabang.

Samtang ang mga organisasyon o mga kompanya, aduna nay target nga mga lugar nga adtuon para hatdan base sa ilang kaugalingong assessment ug impormasyon nga nakuha gikan sa social media diin dunay mga wala pa naabti sa hinabang tungod kay nangatanggong sa mga munisipyo ug layo sab para nila ang pagadto didto.

Ang labing maayo ani, magpatabang ang kapitolyo sa Philippine Navy o sa Philippine Coastguard o bisan sa mga shipping companies aron makarga ang mga hinabang padung didto aron dili na masangit sa traffic.