Mas hapsay'ng tabang
Aron mahimong mas hapsay ang pag-apud-apod sa mga hinabang para sa mga biktima sa umaabot nga mga katalagman, angay'ng magsabot daan ang nasudnong mga ahensiya sa gobyerno, local government units ug pribadong mga organisasyon sa mosunod:
Unsa kadaghan ug unsay isulod sa karton sa relief goods nga puston sa mga boluntaryo, ikarga sa mga sakyanan ug ipanghatag ngadto kabarangayan; ug
Paghimo og lista sa mga pamilya mga maapektahan sa katalagman (pinaagi sa social welfare officers sa mga barangay, lungsod ug syudad) aron maoy basehan kon pilay tigumon nga relief goods.
* * *
Mangahas ko og sugyot nga ang family food packs (FFP) sa Department of Social Welfare and Development (DSWD) maoy sundon sa tanang mangapil sa umaabot nga relief operations:
Unom ka kilong bugas humay (gibanabanang molahutay og unom ka lung-ag o duha ka adlaw nga konsumo sa pamilya nga dunay lima ka sakop);
Sagol nga mga delata sa corned beef (o meatloaf), tuna flakes ug sardinas;
Powdered drinks nga maglakip sa kape ug cereal drinks; ug kon gikinahanglan sagolan og
Banig, habol ug moskitero ug ubang mga sangkap sa panimalay.
* * *
Angay'ng hukman na kon tingbon ba ang pagtigom, pag-repack, paghakot ug pagpanghatag sa relief goods aron nga walay malaktawan ug segurong mahatagan ang tanang tabanganan. O bahinon bang mga lugar nga maapektahan ug i-destino sa mangapil nga mga grupo aron nga mas paspas nga matabangan ang nalista nang mga biktima.
Pinasikad sa kalapad sa kadaot ug gidaghanon sa mga hinabang nga makolekta mahimong balikbalikan ang mga biktima hangtod nga makabarug na sa ilang mga tiil.
* * *
Maumol lang ang mas makiangayong mga lagda pagtinabangay kon ipadaplin sa mga representante sa gobyerno ug pribadong sektor ang ilang mga garbo, pagduda, pamolitika ug personal nga mga interes ug magkauyon nga ang kaayuhan sa mga biktima maoy labing importante.
Angayng ipahibawo dayon sa katawhan ang makab-ot nga kauyonan. Aron kapasaligan sila nga duna nay mas lig-ong garantiya nga ang ilang mga hinabang moabot sa labing dali nga panahon ngadto sa mga biktima. Sa samang paagi makatabang sab ang katawhan pagdasig sa mga hingtungdan sa pagtuman sa mga lagda ug pagbaraw sa bisan unsang pagsuway sa pamolitika ug paukyab.
* * *
- Latest
