Tinubdan sa korapsiyon nabuksan

Sama kakusog sa suntok ni Pambansang Kamao Manny Pacquiao ang matag pulong nanggawas gikan sa baba ni Senador Rodante Marcoleta, chairman sa Senate Blue Ribbon Committee dihang gisugdan na niadtong Agosto 19, 2025 ang pag-imbestigar sa anomalosong binilyong flood control projects. Diin, matagbaw intawog panagang ang resource person.

Kinahanglan motug-an gyod sa tinuod ang resource person. Kay kon matimahoang sige’g pamakak, delikadog ma-cite in contempt. “Basig dili ka na makapauli? Namakak ka na naman!” Warning ni Senador Marcoleta kang Allan Quirante, tag-iya sa QM Builders, kinsa nahisama sa Top 15 companies nga gihatagag binilyonbilyong kantidad para sa flood control projects.

Sa sinugdanan miingon si Allan, wala kuno siyay proyekto. Pero sa pagtuyoktuyok sa imbestigasiyon, nakatug-an nga nakadaghan na diay siya makahimo. Butang, nga nakapahayblad ni Sen. Marcoleta:

“Ang sinabi ng pangulo, kasama ka sa labing lima. Huwag mong maliitin ito. Pagkatapos dito, aartihin mo kami, ay sasabihin mo na hindi ka pa nag-umpisa. Nag-umpisa ka isang hardware. May problema dito, eh! Oh, ana ang totoo?”

“Yong totoo, may lisensiya na tayo. Na doble na.” Tubag ni Allan. Unya, mitando dihang gisukna sa chairman kon na-kuwadropol A ba kini karon? Busa gipangutana kini kon pila na ba ka proyekto ang naagian? Diin, mitug-an si Allan nga kadaghan na. Unang yugto sa iyang pagpamakak.

Hangtod miabot sa puntong gisukna siya kon pila ba gyoy total capital (cash on hand) ni Allan sa iyang mga negsosyo? Ug mitubag: “P40B.” Nga nakapaiknat sa kilay sa chairman: “Ha, P40B?” Ekspresiyong nagpasabot nga dili siya motuo.

Tuod, dihang gipangutana ni Senador Bato de la Rosa si Allan kon may P40B ba gayod? Kini, namahayag: ‘Nga aduna ra kuno siyay P2B kapin sa banko. Pero matag P1B hatagan man sa banko hangtod P15B nga loan, moabot gihapog P40B ang kuwartang iyang magamit alang sa dinagkong proyekto.’ Sa ato pa, namakak gyod diay siya.

Kini nagmatuod lamang sa mga dagkong anomaliyang miabot nag trinilyong nagasto sa higanting flood control project, diin ang kuwarta nawala, pero walay proyektong tarong makita. Kon ako pay Allan, mas maayog motug-an na lang siya sa tinuod, uy!

At least, dili na siya magpanglingo sa iyang likod!