EDITORYAL - Dakong buhi ang boluntarismo

Gipakita pag-usab sa mga Sugbuanon ang diwa sa boluntarismo tungatunga aning katalagman nga miigo sa Sugbu. Partikular ang amihanang bahin sa Sugbu nga kaniadto usab maoy nagrabehan sa pagkuso-kusog sa super typhoon Yolanda.

Karon, sa pag-igo sa 6.9 magnitude nga linog niadtong Septembre 30, subli nasab nga nanginahanglan ang mga molupyo sa amihanan og tabang. Sama sa kaniadto, tubig, pagkaon, ug katulganan sa mga biktima ang gikinahanglan karon didto.

Sama sa nangaging mga katalagman, nahimo nang sistema nga unahon sa gobiyerno ug bisan sa mga pribadong tawo nga nanabang, kadtong pinaka nagrabehan. Ang Dakbayan sa Bogo maoy nakaangkon og grabeng kadaut tungod kay sa ilahang kadagatan ang epicenter sa maong linog.

Karong mga panahona dili lang ang epekto sa linog ang gisagubang sa kalibuang mga biktima didto sa amihanang Sugbu, ang pagsige og bunok sa uwan nakadugang sa ilang problema karon nga klarong wala pa nakabalik sa normal ang ilang kinabuhi.

Ilabi na kadtong mga pamilyang nakabsan sa kinabuhi ug kadtong mga nangaguba ang mga pinuy-anan, problema para nila ang kapasilongan.

Kagahapon, sa Kapitolyo, gatusan ka mga tinun-an gikan sa nagkalainlaing mga unibersidad sa Sugbu ang niboluntaryo aron motabang sa pag-repack sa mga relief goods para dad-on didto sa mga biktima sa linog.

Usa kini ka maayong timailhan nga buhi kaayo ang bolunterismo sa mga Sugbuanon, karon ang mga kabataan, ugma ang mga dagkong organisasyon ug mga kompanya molihuk gamit ang ilang impluwensiya ug kwarta aron makatabang.

Karon, ang The Freeman/ Banat News pinaagi sa The Freeman Foundation usa sa daghang mga organisasyon nga nagsugod na sa pag-mobilarisar sa ilang relief operations. Ang gobiyerno atoa na sa amihanan gikan palang sa pagsugod. Si Presidente Ferdinand Marcos Jr. misaad nga tabangan sa gobiyerno ang tanang apektado dungan sa pagpagawas sa Department of Budget og P375 milyones para sa Sugbu.

Ang Banat News nanawagan sa tanan, ilabi na sa mga Sugbuanon nga dunay malumong kasingkasing nga motunol kutob sa ilang makaya.

Bisan unsa ka gamay, dako kini og tabang para sa mga kaigsuonan nato didto sa amihanang Sugbu nga makalabang sa sunod adlaw hangtud nga sila makabarug pagbalik.