SOPA puno sa gugma ug kaguwapa

Hait ang mga pulong nga nanggawas sa iyang baba ug mitaop sa dughan sa mga nakasaksi-namati. Apan dili kasakit ang mabati.

Kondili, kahumpay sa samad nga kanhi hagbay rang giantos, kay niini lang iyang pagpamunoan sa probinsiya sa Sugbo, nadapatan og tukmang medisina.    

Ang mga pulong nga manggula gikan sa kasingkasing sa mamumulong, motuhop sab ngadto sa kasingkasing sa mga makadungog.

Ug mao kini ang nahitabo sa unang State of the Province Address (SOPA) ni Cebu Governor Pamela ‘Pam’ S. Baricuatro sa miaging Agosto 29, 2025 nga matod pa sa usa ka maglilindog-magsisibya, Straight to the Point, Atty. Ruphil Fernandez Bañoc, makapanglimbawot sa balhibo. Sanglit kon unsa man ang gipangyawit sa gobernador nakita man tinuoray sa iyang mga nabuhat.            

Tiaw bay, sa 60 ka adlaw pa lamang niyang pagpangalagad, daghan na siyag kausabang nahimo nga makaayo sa katawhan, kinsa wala makatilaw niini sa miaging administrasiyon.

Hinuon, dili tanan. Kay kadtong duol sa luwag makakaon bayag lami. Pero mao lagi, sila ra! Dili tanang Sugboanon.            

Dili sama ni Gov. Pam, nga maoy giuna dayon ang pag-enhance-pagpaimprobar sa atong provincial hospitals ubos sa iyang masaligang health care program ug usab ang bahin sa nutrisiyon sa probinsiya.  Gani, siya misaad:

“No Cebuano should go hungry by 2030.” Pagkalami paminawon! Napuno sa gugma nga gipatubod gikan sa guwapang kasingkasing. 

Apan bisan pag unsa nimo kamaayo, dili gyod nimo mapadayeg tanan.

Aduna gyoy moalkontra-saway. Labi na niadtong iyang pagsulti:

“To those who think cases are enough to shake me, you are mistaken. I will face them head on. The truth is on our side.”            

May mikomento nga morag nangampanya gihapon si Gov. Pam, nagisge gihapog hagit-pangaway. Unta, tutokan na lang niya iyang trabaho ug maoy puy-an pirme ang kamapahiubsanon ug kamapasayloon.

Kay basin bayag dili siya makatiwas sa iyang termino? Dili ba miingon ang Ginoo: “Love your enemies?”            

Sa bagay, very constructive ang maong kritisismo. Morag nagpasidaan: “Hinayhinay lang, Gov., kay basig naay makapandol sa unahan. Ug mausik ang kaguwapa sa imong SOPA.

Nga mapiksan lamang sa daw asidong nagbukal nimong emosiyon.” Mahal ka sa mga Sugboanon. Ang Ginoo maoy pirme pamatia. Ug nungkang, imong kontra!