EDITORYAL — Andam kanunay

Napugwat ang tanan pagtay-og sa 6.9 magnitude nga linog sa Sugbu niadtong Septembre 30.

Ang pagtay-og nabatyagan sa mga kasikbit nga mga isla sa Central Visayas nga ang sentro naa sa kadagatan sa dakbayan sa Bogo.

Walay warning, walay pananghid,basta lang giuyog ang palibot nga niresulta sa daghang kadaut sa palibot, apil na mga estraktura.

Ang labing sakit, nikalas ni og daghang kinabuhi, apil mga bata.

Ang maong  linog nakapahinumdom sa mga Sugbuanon sa sayu sa kabuntagon nga 7.2 magnitude nga linog sa Sagbayan, Bohol niadtong 2013 diin duna say mga nakalas ug daghang kabtangan ug imprastraktura ang nagusbat.

Apan lahi sa 2013, mas daghan ang nakalas karon tungod kay gabii kini nahitabo, ang uban sa mga nakalas namahuway na sa ilang mga pinuy-anan.

Kaning tectonic origin nga mga linog maoy lisud mabantayan nga padung mahitabo sukwahi sa volcanic origin nga mamonitor gyud ang kalihukan sa mga bulkan ug dunay mga senyales nga kini mobuto.

Kay ang Pilipinas naay daghang faults o mga liki ilawom sa yuta ug nagpatong sa gitawag nga “ring of fire” sa Pasipiko, kinahanglang apil gyud sa pangandaman, dili lang bagyo, kondili hasta ang paglinog.