Mga tsekeng paso makapaso

Gisugat man tuod og mainitong paghangop sa mga taga Bantayan ang pag-abot sa Cebu Provincial Serbisyo Caravan Team nga pinangulohan ni Cebu Governor Pamela ‘Pam’ S. Baricuatro niadtong Agosto 15, 2025, apan napiksan gihapog kaparat ang maong panagtagbo, dihang pagdiskurso ni Daanbantayan Mayor Orlando ‘Lex’ Layese atubangan sa nakaplastar nang Caravan Team napusgay ang balod ug mitualsik sa lapyahan, sa yugto, diin iyang gisaysay:

‘Nga ilang lungsod adunay 13 ka stale check (paso-bahaw-pan-os-paso nga mga tseke), tanan nagkantidad og P48M, diin gusto ni Layese nga maaprobahan gilayon ni Gov. Pam ang pagbag-o niini kay dako kinig ikatabang alang sa mga programa-proyekto sa ilang lungsod.’

Pagka-demanding nga mayor! Sa ilang paghupot og 13 ka stale check lapas sa unom ka bulan gikan sa miaging administrasiyong Garcia, ang mipuli maoy iyang dalidalion? Sensitibo man kini nga isyu. Susihonon pa man kini nganong nabahaw man?

Dili sayon ang pagpahimog tseke alang sa usa ka proyekto. Daghan kag proseso ug departamentong maagian.

Segun lang sa akong kasinatian kay nakatrabaho man kog kompaniya sa gobiyerno kanhi, mobuhat gyud kag formal letter addressed to the Branch Manager para kini mapagmitingan sa Branch Management Panel nga gitambongan sa tanang Department Heads: Security, Operations, Treasury, Accounting, Finance, etc.

Ug anha na mabuhatag tseke kon maaprobahan.

Unya, ang tseke moagi pag mga hingtungdang departamento para ikonpirmar kon husto ba ang nakabutang sa naaprobahang kantidad.

Ug human kini ma-review sa tanan, ayha pa pinaleng mopirma sa tseke ang branch manager. Ingon niini kataas ang proseso sa paghimog tseke. Labi na, ang pagbag-og stale checks? Unta, hisabtan kini ni Mayor Layese.

Ikaduha, subayon pod kon kanus-a ba naabot-nahimo ang maong mga nahisgotang tseke didto sa Daanbantayan Treasury Office: sa paglingkod pa ba ni Gob. Garcia, or sa hapit na mobiya sa Kapitolyo? Unsaon, dili transparent ang Transition Period nga iyang gidalit ngadto sa mipuling administrasiyon. Mao nga dili malikayan, may mahulmang pagduda sa hunahuna.

Ug delikado, nga sa tantong pakisusi kon nganong gamitonon man kaha kaayo ang maong mga tseke, unya nganong napaso man?

Kalit lang mabuksan ang nag-aso-asong tinagoan nga naiwagan sa kamatuoran.

Maong nakaingon ko: “Ang mga tsekeng paso, usahay, makapaso!