EDITORYAL — Dismayado ang mga Pilipino

Dismayado ang daghang Pilipino aning pagkadiskubre sa gialegar nga gipanag-iyang air assets sa usa lang ka magbabalaod nga mas daghan pa gani kun itandi sa air assets sa usa sa mga ahensiya sa gobiyerno nga gitahang mobantay sa kadagatan palibot sa Pilipinas.

Ang maong magbabalaod mao si Ako Bicol Party List Rep. Zaldy Co kansang pangalan nigawas sa imbestigasyon bahin sa anomalya sa flood control projects sa gobiyerno nga gipaimbestigar ni Presidente Ferdinand Marcos Jr.

Mismo ang tigpamaba sa Philippine Coast Guard (PCG) nga si Commodore Jay Tarriela nakaingon nga pwerteng layoa sa deperensiya sa air assets nga naa ang ilang ahensiya kun itandi sa sobra P4 bilyones nga kantidad sa mga abyon nga matud pa iya ni Co.

Ang Department of Public Works and Highways (DPWH) pormal na nga nihangyo sa Anti-Money Laundering Council (AMLC) nga i- freeze mga abyon sa Misibis Aviation nga balor P4.29 bilyones ug Hi Tone Construction & Development Corp. nga balor P456 milyones, kay matud pa konektado kini kang Co.

Sumala pa nga dunay siyam ngadto sa 11 ka mga abyon ang maong magbabalaod, apil ani ang usa ka Gulfstream 350 jet nga mobalor og P2.07 bilyones.

Samtang ang PCG aduna lamang duha ka fix wing aircraft ug duha ka helicopters nga gigamit sa pagpatrolya ug pagbantay sa lapad nga kadagatan sa itbuok Pilipinas, ilabi na sa West Philippine Sea.

Wala pay opisyal nga gipagawas nga tubag ang kampo ni Co bahin aning mga alegasyon batok kaniya tungod kay nilarga kini sa gawas sa nasud sa wala pa pormal nga makabuwelo ang imbestigasyon diha sa Senado. Kung tinuod man kini o dili, kinahanglang mopauli siya sa nasud aron klaruhon ug malimpyohan iyang ngalan.

Apan kinahanglang paminawon sa Department of Justice ug sa Independent Commission for Infrastructure (ICI) ang singgit sa katawhan kung gusto gyud nilang maputol ang kurapsyon sa nasud, gukdon ug walay ilhon bisan kinsa pa ang nalambigit aning tanan.