Insertions sa Sugbo
Daghang salamat sa dugang kasayuran nga nahipos sa Senate Blue Ribbon Committee nga nangimbestigar sa Trillion Peso Scandal sa flood control projects, madugangan nang mga pangutana sa mga Sugboanon sa mga politiko nganong imbes masulbad nisamot man hinuon ang problema sa baha dinhi sa ato.
Ang mga kongresista ug lokal nga mga opisyal dili nang kadangop sa paboritong lusot nga wala silay labot sa proyekto. Kinahanglan na nilang ilhon kinsa ang tinuod nga nagpasiugda, nananghid ba o nidiretso lang sa pagtukod sa mga proyekto sa ilang mga lugar.
* * *
Tulo ka proyekto nga gipasiugdahan ni Ako Bicol Partylist Representative Zaldy Co, nga kabahin sa P13 bilyones niyang insertions, nga nalista sa Sugbo: Sa A.S. Fortuna Street ug Tipolo Creek sa Mandaue City; sa Barangay Pakna-an, Mandaue City; ug sa Barangay Ginablan, Badian, Cebu.
Wala pay istorya silang Kongresista Lolypop Ouano sa Mandaue lone district ug kanhi Kongresista Peter John Calderon sa ikapitong distrito kon nananghid ba si Co nila (ug nibayad ba og 5% nga parking fee) o nagbuotbuot ra si Co (nga gitawag og sagasa).
* * *
Sa public hearing sa House Infrastructure Committee pila ka semana nang nilabay, niinsistir si Kongresista Edu Rama sa south district sa Cebu City nga wala siyay labot sa flood control projects sa Department of Public Works and Highways (DPWH). Angay'ng isulti ni Rama kinsay nagpasiugda ug kon sagasa o may parking fee ba.
Sa samang paagi, kinahanglang ilhon ni Talisay City Mayor Samsam Gullas kinsay proponent sa nabulilyasong proyekto sa QM Builders duol sa Manipis. Kon dili ang iyang asawa nga si Kongresista Rhea Gullas, may parking fee o sagasa ba?
* * *
Hangtod karon wala pa tultola ni kanhi Senate President Chiz Escudero asang dapita sa Sugbo gitukod ang iyang mga proyekto nga balor og P4 bilyones, kabahin sa P142 bilyones niyang insertion sa 2025 budget.
Gipasanginlang silang Co ug Escudero nga nangolekta og 25% sa budget sa kada proyekto nga gilista sa DPWH sa ilang insertions.
Natsambahan ba nga tinarung ang ilang mga proyekto sa Sugbo? O sama sa Bulacan ug Metro Manila gihimo ang proyekto para panguwarta ug dili sa pagpanalipod sa katawhan gikan sa baha?
* * *
- Latest
