Ang mga Arkanghel ug Angheles sa atong kinabuhi

Sila kadtong gihimo sa Dios nga lunlon Espiritu. Mao nga ato silang sabton dili sa ilang kinaiya kondili sa ilang mga buhat ug pulos.

Sama kanato ang mga arkanghel ug mga Angheles dunay mga kabubut-on, kahibalo ug kagawasan.

Ang mga arkanghel nga natala diha sa balaang kasulatan mao man sila Si Rafael (ang nikuyog kang Tobias anak ni Tobit ug siya kadtong nigukod ug nigapos kang Asmodeus).

Si Gabriel mao kadtong nagpahibalo kang Zacarias ug kang Maria mahitungod sa taliabot nga pagkahimugso ni Juan Magbubunyag ug sa Mesiyas nga si Kristo Jesus.

Si Miguel sa laing bahin mao kadtong nangulo aron gubaton ang dragon nga mao ang karaang kaaway nga mao ang yawa panahon unya sa Armagedon.

Kauban sila nato ug kuyog sa atong panaw. Matag usa kanato dunay mga anghel nga magbalantay nga maoy maggiya kanato sa adlaw sa panghukom. Kun adto kita sa langit kita ubanan nila.

Kun adto kita sa purgatoryo sila mag-uban kanato ug magpaabot kanato hangtud kanus-a kita pagahaw-ason.

Kun moadto kita sa impiyerno sila usab ang motambog kanato didto.

Kay kita pagahukman man segun sa atong binuhatan dinhi sa kalibutan.

Ato silang sangpiton sa kanunay. Sila ang atong abyan nga mokuyog kanato padulong sa tinud-anay natong pinuy-anan nga mao ang langit.

Pinaagi sa mga mata sa atong pagtuo atong masabtan nga ang mga anghel ug mga arkanghel nisalamin lamang kun unsa kita ka pinangga sa Dios nga tungod niini gihatagan kita og mga abyan ingon nga atong mga giya ingon man panalipod.