Ang Kawalay Pagpakabana

Septiyembre 28, 2025: Ikakawhaag-unom nga Domingo sulod sa tuig

National Seafarer's Day/Migrants Sunday

 Mga Pagbasa:   Am. 6;1,4-7/Sal. 146/

1 Tim. 6;11-16/Lk. 16;19-31

Dinhi sa ebanghelyo karong Dominggoha adunay duruha ka mga mahinungdanong karakter. Ang dato ug si Lazaro. Si Lazaro nag-antos sa mga nuka ug labaw sa tanan sa kawalay makaon.

Ang Dato sa laing bahin puno sa kaabunda. Ug tingali daghang mga sulugoon ang nag-atiman sa iyang mga panginahanglan.  Managsama silang nangamatay.

Si Lazaro namatay ug nahidangat sa Paraiso uban kang Abraham. Ang dato usab namatay apan nag-antos sa hilabihan didto sa Hades.

 Dugang pa, anaa ang dakong bung-aw nga nag-ulang kanila. Ang si bisan kinsa kanila ang dili gyud makaduol. Mao nay giingon nga happy now cry later matud pa.

Diha sa sala anaa ang Sin of Commission kun ang pagbuhat sa dili kinahanglang buhaton. Anaa usab ang Sin of Omission kun ang wala pagbuhat sa kinahanglang buhaton. Ang pagbuhat sa dili kinahanglang buhaton maoy gikahadlokan sa kadaghanan kanato ug atong gilikayan. Sa laing bahin, pakyas kita sa pag-alinggat nga kadaghanan kanato nakabuhat man Sin of Omission.

Ang pagkawalay pagpakabana diay maoy magdala kanato ngadto sa kalaglagan. Kita pagahukman sa paagi nga atong gisanong ang paghigugma sa Dios ngari kanato pinaagi sa paghigugma kaniya diha sa atong mga kaigsuonan.  Matag usa kanato dunay kaugalingong mga concerns ug mga kabalaka apan dili kini babag aron mohimo kita og maayo alang sa uban.

Ang paggamit sa atong kagawasan nagpasabot man og paggamit niini aron mohimo og kaayohan alang sa uban nga nagkinahanglan labina kanila nga dili makalbalos sa kaayohan nga atong gipaambit.

“Ginoo sa mga tawo nga nag-antos ug nagkinahanglan sa bisan unsang hinabang, apan wala namo maatiman, pasayloa kami O Jesus!”