Duna nay gikulbaan nga sila matultolan sa NBI

Giutingkay na karon sa National Bureau of Investigation Central Visayas Regional Office ang mga flood control project sa mga dapit nga sakop sa ilang hurisdiksyon. 

Gani lakip sa ilang giadto kauban ang mga sakop sa media ang bukirang Barangay sa Bonbon sa Cebu City. Duna silay napalgan nga mga FCP nga taudtoad nang nahuman ug duna pa usay humanonon pa.

Hinuon kong estraktura lang ang basehan sa unang tan-aw wala pa may lama sa kagabok o maingon nato nga pulido ang pagkatrabaho.

Pero dunay nadiskitahan sa mga NBI investigators nga mga revetment wall nga gisumpaysumpay ra pero lainlain og contractor ug lainlain usab ang budget.

Usa kini sa ilang pangayoan og katin-awan pinaagi unya sa mga dokumento nga ilang nakuha gikan sa DPWH ug ikompara nila sa data sa ubang ahensya sa kagamhanan sama sa Commission on Audit ug uban pa.

Sa pagkakaron dili pa sila makaingon kong dunay depekto ang mga proyekto sa Barangay Bonbon hangtud masubay nila ang tanan kong wala bay sami o sabod kining maong proyekto.

Gikatakda usab nilang adtoon ang ang flood control project sa Barangay Budlaan nga una nang giadto sa mayor sa dakbayan sa Sugbo Nestor Archival ug sa unang tan-aw pa lang makita na gyud ang pagkapahak sa proyekto nga posibleng substandard kini kay dali ra man napahak ug nahunlak gihang gikuhit sa baha.

Ang pakisusi sa NBI subay usab sa mando sa Department of Justice nga subayon ang tanang FCP kadtong ghost project ug mga substandard nga naghitak karon sa nasod nga maoy nakaingon sa pag alsa sa mga tawo.

Kadtong mga dunay gihimong milagro aw gipangulbaan na karon. Diri kaha sa Sugbo naa kahay nagsige og panaghot nga nangalyupo nga dili mabisto, unta wala lang kay sa higayon naay motumaw aw ambot lang kong madutlan pa ba sa uwaw.

Tulo ka team of investigators ang gitahasan sa imbestigasyon aron mas mapadali kay tibuok lalawigan sa Sugbo ang gisudlay sa NBI kay ang Cebu maoy number 2 nga adunay labing daghan sa flood control project sa tibuok nasod nga buot hunahunaon dili man gyud ingon ana ka grabe ang problema sa baha intandi sa ubang dapit sa nasud.

Hinuon sa Mandaue City ug Cebu City given na na mga grabe pud ang sitwasyon kong baha na ang hisgotan.

Nagsugod pa karon sa Luzon, basin sunod na ang Visayas kay sa kadaghan sa proyekto sa pagkontrolar sa baha syaro og walay mabaling ang mga mga imbistigador.

Kulba-hinam pud baya ang mga mosunod nga anib sa flood gate drama.

Sa umaabot nga mga adlaw duna pay nga surprisa nga atong masaksihan kong asa kutob sila anoron ug lumsan sa ilang dautan nga binuhatan.