Pag-usab-disiplina sa modernong panimalay

Sa una, ang mga ginikanan nagtubo sa konserbatibong kalibotan diin ang disiplina giisip nga tuburan sa gugma. Normal rang makasab-an, kastigohon, o silotan ang bata kon masayop.

Apan karon, lahi na ang dagan. Ang mga balaod sama sa Republic Act No. 7610, ang Special Protection of Children Against Child Abuse, nagbutang og utlanan sa unsay angay ug gidili sa disiplina.

Importante kaayo kining balaora sa pagpanalipod sa mga bata, pero adunay kalibog: kanus-a man mahimong abuso ang disiplina?

Daghang ginikanan karon ang nagpanuko ug mahadlok nga masayop ug masakpan. Resulta? Sagad sa mga bata karon walay respeto, dali masuko, ug sobra ka-sensitibo. Ang social media nakadugang pod, diin nakapasamot sa ideya nga ang ilang pagsupak simbolo sa ilang katungod.

Apan ang panginahanglan sa kabag-ohan nga pangginikanan wala magpasabot nga mobalik ta sa karaang pamaagi. Kondili, kinahanglang magmaminatngunon ang pagdisiplina, puno sa katarong-kaluoy-pagmahal ug matulon-anon.

Gawas sa balaod, kinahanglan usab nato palig-onon ang edukasyon sa mga ginikanan ug magtutudlo. Ang disiplina dapat sabton sa mas lawom nga paagi, dili lang pamaagi sa pagsilot, kondili, paagi sa pagtudlo og bili sa kinabuhi.

Ang pagpatubo sa bata nga adunay baroganan, kahadlok sa sala ug respeto sa uban, nagkinahanglag buhing ehemplo gikan sa mga ginikanan.

Dili igong motudlo lang, kinahanglan ipakita gyod sa ginikanan giunsa pagdapat ang hustong desisyon sa mga panahong lisod.

Ang disiplina kabahin sa matuod nga gugma. Busa, dili magbilin og samad.

Kondili, pagtulon-an! Kinahanglan nato karon ang usa ka kulturang makapadayag-tudlo sa kalainan sa pagtul-id ug pag-abuso, sa pagbaton og lig-ong baroganan.

Kinahanglan magtinabangay ang mga ginikanan, magtutudlo, ug mga magbabalaod. Kay kon mapakyas, posibleng magtubo ang bag-ong henerasyon sa hiwing pamaagi ug dili makat-on sa pagdawat og mga pagsaway.

Sa kataposan, ang pagkab-ot sa tukmang balanse tali sa disiplina ug pag-atiman dili sayon buhaton apan posibleng mahitabo kon kab-oton lang gayod. Dili kinahanglan mamahimong mangtas, nga usahay tungod kay naghinobra moresulta na hinuon sa maot nga linugdangan.

Kinahanglan lang nga ang disiplina adunay pirmeng kauban nga pag-antos-pagpangga-pagkamasinaboton.

Kay kon ang bata magtubo, diin iyang hisabtan nga ang pagdisiplina usa diay ka dakong gugmang gipatagatam sa iyang ginikanan, magdako siyang usa ka responsable-buotan-ligdong tawo.