Nganong tak-om
Walay kongresista sa Sugbo nga nipakita sa Trillion Peso March sa Fuente Osmeña Rotunda niadtong Lunes sa hapon. Ambot unsay ilang rason:
Wala ba makabantay sa kalapad sa kasuko sa mga Sugboanon batok sa mga responsable sa usa ka trilyon ka pesos nga kawat sa flood control projects sa tibuok nasud sa nangaging katuigan?
Nagtuo bang sama sa nangaging mga protesta pul-an rang mga magbubuhis o malipat kon dunay motumaw nga bag-ong mga eskandalo?
Giisip nga ang pag-apil sa protesta usa ka wala kinahanglana nga kahasol sa haruhay nilang kinabuhi?
* * *
Cutie del Mar. Edu Rama. Rhea Gullas, Edsel Galeos. Karen Flores. Sun Shimura. Duke Frasco. Daphne Lagon. Patsy Calderon. Lolypop Ouano. Ahong Chan. Sonny Lagon. Raymond Mendoza.
Sila untay labing unang nagpakabana sa Trillion Peso Scandal. Kay apil sila sa gipasanginlan nga kinadak-an og kawat sa mga proyekto nga imbes mosulbad nipasamot na hinuon sa mga baha. Sila untay labing agresibong nipasalig sa kapuslanan sa flood control projects sa ilang mga distrito, sa katarung sa pagpatuman ug sa kadaghan sa mga kinabuhi ug kabtangan nga napanalipdan gikan sa katalagman.
* * *
Kon wala mangawat, sila untay labing kusganong nanalipod sa ilang kaugalingon ug sa ilang pamilya labi na sa ilang mga anak. Sila untay labing mapailubong nipasabot sa mga magbubuhis sa proseso sa pag-ila sa proyekto, pagkuha og pundo, bidding ug implementasyon.
Dili na mailad ang publiko sa naandang pamalibad nga wala silay labot sa pagpatuman kay igo lang ni-aprobar sa budget (labi na kon nangawat og kredito sa mga proyekto nga gigastohan sa buhis dili sa ilang kuwarta).
* * *
Kay nagpakahilom man hangtod karon may sukaranan bang pasangil nga nakakuha ang mga kongresista og 25% sa kada proyekto? Aron lang duna tay ideya unsa kadaghan ang kuwartang nahisgutan:
Segun sa Department of Public Works and Highways, P26 bilyones ang flood control projects sa Sugbo sa niaging tulo ka tuig;
P6.5 bilyones ang 25%; ug
Kon kuridas ang nadawat, mahimong P500 milyones ang bahin sa kada usa.
Kon pataka ang mga pagduda, sayon rang barawon: Ipakita ang ilang Statement of Assets, Liabilities and Net Worth (SALN); ug mopirma og waiver sa ilang bank accounts.
* * *
- Latest
