Padre Giovani mokumpisal ang nasud

Nahimo kong fan sa DYHP kaniadto pa. Ang mga drama sa radyo kaniadto padayong nabuhi sa akong panumdoman.

Gani, dakong kalipay nako nga nakasulat gyud og drama sa radyo. Kaanindot unta kon mosulat ko og balik no?

Apan ang ang sugilanon ni Padre Giovani maoy nakapadasig baya nako pagsulod sa seminaryo. Sinulat kini sa banggiitang magsusulat nga si Fermin Collantes Gomez.  Ang sentro sa sugilanon mao man ang pakigbisog sa maong pari batok sa malupigong gambalay nga gipaluyohan sa mga politiko nga anaa sa pagkatawo ni Mayor Mateo.

Guns and goons maoy uso kaniadto ug gani bisan tingali karon.

Naa pay pakapin nga kurakotay ug patigayong illegal alang sa kaugalingong katagbawan bahala na kun maalaot ang kinabag-an.

Ning panahon sa politikanhon ug moral nga krisis ug kalibog daghan ang nangutana kun asa ang Simbahan.

Apan sa pagkatinuod lang ang simbahan wala man magpakahilom hinunoa padayon siyang mamahimong tingog ug tanlag alang sa kadaghanan bisan pa man kun tingali siya nahimong nakaambit sa kahugawan sa katilingban pinaagi sa iyang mga sakop nga nahisalaag.

Ang kumpisalan dili lang alang sa mga layko apan apil na usab kini alang sa mga kaparian.

Ning panahon sa kalisdanan unta maghiusa kita sa panghimayad sa atong mga kasaypanan batok sa atong nasud ug sa atong simbahan.