Unsay nakuha sa rally?

Nagkalainlain ang lihok protesta nga gipasiugdahan niadtong adlaw nga Domingo petsa 21 sa Septiyembre 2025. Ang protesta gitumong alang sa pagkondinar sa grabing pangawat nga gihimo sa sindikato nga gilangkoban sa tag-as nga opisyal sa gobiyerno, opisyal sa Department of Public Works and Highways (DPWH) ug mga kontraktor sa salapi sa katawhan nga mikabat ngadto sa binilyon.

Nagkalainlain nga grupo ang misalmot sa protesta nga nagdala usab sa lainlain nilang interest. Gani klaro kaayo ang agenda ug motibo sa uban nga grupo nga misalmot sa lihok protesta. Maklaro kaayo sa kolor nila. Sa gipahigayon nga lihok protesta unsa man ang nakabot o nakuha sa mga nagprotesta? Bun-og, samad ug posible pang adunay kinabuhi nga nakalas?

Nagprotesta sila batok sa mga kurakot ug mga nangurakot pero panahon sa bugnong lugaynon ila ra gihapon kining pilion. Wala pod mga dagkong kurakot nga nadugta sa prisohan kay wala sila napamatudan nga sad-an bisan klaro na kaayo ang ilang pagka kawatan. Kun may napriso man kadto rang linibo lang ang nakawat. Ang nakakawat og minilyon ug binilyon giabibahan pa, gipagakpakan ug gipakahiro pa sa pariha rapod nilang kawatan. Ang mga Marcos gipatiran na ug gipalayas sa ilang pagpuyo sa Malakanyang pinaagi sa People Power One tungod sa pagpangorakot ug pag abuso sa gahom uban sa iyang mga kaalyado pero gibalik sila sa pagbutang ang mga Marcos sa Malakanyang.

Karon nagprotesta tungod sa korapsiyon sa Marcos administrasyon ug sa iyang mga kaalyado sa politika.

Bisan pa og mipalayo sa isyu sa korapsiyon si Presidente Marcos pinaagi kunohay sa iyang gipakita nga kalagot sa mga nadiskobrihan nga mga dili makitan ug mga substandard nga mga flood control project nga gipundohan sa bilyones nga salapigikan sa salapi nga wala maapil sa iyang gisumitir sa Kongreso nga National Expenditure Program (NEP) o inserted budget. Apan dili siya makapanghunaw niini tungod kay ang Presidente maoy mipirma sa nasudnong budget. Kun wala pa mouyon ang Presidente sa budget insertion, wala unta niya pirmahi sng 2025 national budget. Pero iya gipirmahan.

Gawas niini, kun tininuod pa ang kalagot kunohay sa Presidente sa korapsyon, nganong dili man siya gusto nga mag imbistigar ang Senate Blue Ribbon Committee ni Senador Rudante Marcoleta ug sa dihang nadayon ang imbestigasyon ug gihinganlan na sa mga Discaya si House Speaker Martin Romualdez, Congressman Zaldy Co, Roman Romulo, mga opisyal sa DPWH ug uban pa niyang mga kaalyado gipailisan niya tanan ang nga opisyal sa Senado.

Nangluspad ang Malakanyang ug Ubos Balay Balauranan sa testimonya sa mga Discaya. Nahadlok ang Malakanyang tungod kay mismo sa Ilocos Norte nga gingharian ni Presidente Marcos daghan og nakuhang kontrata ang nga Discaya.

Sa mga protesta niadtong Domingo wala ba mo makabantay nga taphaw ra ang ilang singgit-singgit? May nakuha ba sila sa ilang singgit-singgit gawas lang sa ilang bun-og sa lawas, samad ug ka pagaw sa tingog? Wala! Hinuon ang uban sa grupo nga nagprotesta makagamit sa ilang gihimo sa pagtigom og pundo nga salapi gikan sa ilang pinansir sa gawas sa nasud.