Priso na!

Tungod sa pagtumaw sa social media, daghan ang nahatagan og kahigayonan nga mahisama na sila sa mga news reporter, commentator sa radyo, ug ang uban mosundog sab sa mga columnist sa mantalaan.

Ang mga legitimate media personality gitudloan kon unsay dili maayo nga isibya ug dili maayo nga isuwat kay kalapasan kini sa balaod.

Apan daghan sa mga netizens ang wa matudloi niini, mao nga daghan ang magpataka lang pag-upload bisan unsay masu’d sa ilang utok.

Sama karon, kadtong tawo nga naghimo-himo og fake news nga gihimo-himoan og pamahayag si Kongresista Lolypop Ouano-Dizon aron nga masuko niya ang mga tawo, unya gi-upload sa social media, nadakpan na og gipriso.

Nahinumdom mo niadtong skywalk sa Mandaue nga nadumbolan og habog nga sakyanan, ug kay kuyaw na man, giguba na lang aron ilisan.

Dunay tawo nga mi-upload og mensahe sa social media nga mahal ra kuno kaayo ang kantidad nga gigasto sa skywalk.

Si Redmon Colina, taga Barangay Centro, Mandaue City, mi-upload sa hulagway ni Kongresista Lolypop sa social media ug gibutangan niya og mensahe, nga kuno ang magbabalaod, miingon:

“Kon wa mo malipay sa P20 million nga skywalk, ayaw mo og agi diha. Para ra kana sa mga Mandauehanon nga kahibawo mo appreciate sa akong project.” Gibutangan pa og logo sa Kongreso aron ingnon nga gikan gyud ni Lolypop ang pamahayag.

Gusto ni Lolypop nga dili modaghan ang ingon niini nga matang sa mga tawo nga kusog maghimo-himo og mga Fake News mao nga iyang gipasakaan og kaso. Aw, karon anaa na sa prisohan si Redmon Colina.

* * *

Alang sa mga netizens, pagbantay gyud mo. Kon makahimo kamo og kalapasan sa cyberlibel, dili na kini iagi pa sa mga barangay mediators, deritso na kini sa prosecutor’s office ug ngadto sa korte.

Ini’g abot na sa kaso sa korte, ang huwes moisyu dayon na og warrant of arrest aron kamo dakpon ug makaatubang sa korte alang sa paghusay sa inyong mga kaso.

Tambag nako, kon hilig kaayo ka mo-upload og mga content diha sa social media, o kaha miapil ka sa mga legitimate media organizations apan wa ka pa masayod sa mga lagda sa Cyberlibel, basaha gyud ang balaod.

Makadaghan ko makabasa nga dunay mga netizens nga kon may silingan sila, o mga tawo nga wa nila mauyoni, ila dayong himoan og post sa social media.

Timan-i nga bisan og dili pa ninyo hinganlan ang tawo diha sa inyong gi-upload sa social media, mahimong maigo gihapon kamo sa balaod kay mao na ang gitawag og “innuendo.”