Inalisngaw sa iti nakapatalaw

Pagtagbo nila ni misis ug sa iyang suod higala didto sa gipanag-iya niining restawran sa miaging pipila ka semana, kinsa atua na manimuyo sa probinsiya human mamatay iyang banang seaman panahon sa mapintas nga paghurementado ni Covid-19.

Gipaambit sa biyuda ang mapait niyang kasinatian bahin sa iyang balay sa usa ka subdivision dinhi sa dakbayan sa Sugbo, diin sa kadugay na kini niyang igbabaligya, hangtod niining pagsulat, wala gihapon mahalin. Ngano? Sa tinuoray, daghan nang interesadong mopalit sa maong balay kay may pagka-classy type man.

Ang lokasiyon ania ra sulod sa siyudad ug ang presyo nahisubay sa patas ug makatarunganon kaayong kantidad kon ang current fair market value maoy hisgotan. Gani, mas barato pa!

Nakadayeg ang mga mamalitay sa unsay ilang nakita sa sulod sa balay ug sa pagka-deseniyo niini.

Pero ini’g panganaog og moestar sa tugkaran sa maong balay, kalit lang mokulismaot ilang nawong tapos makahanggap og inalisngaw sa bahong iti sa mga binuhing manok nga igtatari gikan sa silingan nga anaa duol ra gayod sa gitarokan sa igbabaligyang balay. Resulta? Tanan, nanalaw ug pulos nangatras!

Hingamiga, buotan ug manggiikogon kining amiga sa akong misis.

Sa inigsuong paagi, iyang giistoryahan ang hingtungdang silingan bahin niining maong bating kahimtang nga nakapasakit sa iyang dughan.

Tiaw bay, kadaghan na unta hapit mahalin iyang balay, pero tungod sa inalisngaw sa iti, kini napugngan – wala madayon?

Ug unsay gitubag sa maong silingang namuhig manok? Igo ra kuno siyang gipahiyoman, uy! Ug wala g’yud hatagig bili ang iyang indirektang hangyo nga hunongon na kini ug adto ibalhin sa dapit nga walay panimalayng madistrubo.

Makadismaya kining grabe ka insensitibong taras sa maong silingan.  Kay usa baya siya sa mga opisyales sa board sa ilang subdibisiyon, kinsa apil sa pagpanday og balaod nga ipasunod sa tanang homeowner.

Diin, nahiapil sa gidili ang pagpamuhig baboy o kamanokan. Sanglit, ang subdibisiyon usa man ka puluy-anan sa mga tawong nagmahal sa kalimpiyo-kalinaw-kahilom diha sa ilang pagkatulog.

Ug dili sa mga hayop nga tigbunggag mga hugaw.

Unta, mahimong suga kining atong lindog nga makapahayag sa nangitngitang hunahuna ug mao nay mohari ang bulawanong bidlisiw sa iyang paghimata. Buwahan, ang unsay napugngan, makaagi-lusot na!