EDITORYAL - Pag-limit sa ma withdraw nga kwarta

Usa ka maayong lakang ang gihimo sa Bangko Sentral ng Pilipinas nga limitahan ang gidak-on sa kantidad nga mahimong i-withdraw sa tanang mga bangko sa Pilipinas.

Ang Bangko Sentral ng Pilipinas pinaagi sa Circular 1218 nga gipirmahan ni Governor Eli Remolona Jr., gimandoan ang tanang mga bangko ug mga BSP-supervised financial institutions (BSFIs) nga mag-estrikto ug magbantay og maayo batok aning money laundering, counterterrorism financing and proliferation financing nunot aning nagkadaghang pagpasapasa sa kwarta pinaagi sa bangko.

Haom kaayo kining pagpatuman sa BSP sa maong circular nunot aning eskandalo sa kurapsyon sa flood control projects sa gobiyerno nga naglambigit og bilyones ka pesos nga napadulong sa mga bulsa sa mga hiwing opisyales sa gobiyerno ug sa mga kakunsabong kontraktor.

Gilimitahan lang ang cash withdrawals og P500,000 kada adlaw, apan kinahanlan nga suportado o kuti-kutihon kadtong mo withdraw og ingon ani kadako nga kwarta.

Kung mosobra gani ani ang kinahanglang i-withdraw kinahanglang makapresentar og balidong mga dokumento ang tawong mopagawas aning kwartaha nga cash, sama sa pagpamatuod kun unsa ang iyang trabaho, negosyo, income ug uban pa.

Apan kinahanglan sab nga tseke lang ang i-release kanila, fund transfer, direct credit to deposit accounts,  ug uban pang, matang sa digital payment platform sa BSFI.

Usa kini ka maayong lakang, kay kinahanglan nga “whole-government approach” ang kampanya kontra kurapsyon tungod kay dali rang taguon ang kwarta kun naa na sa mga kamot sa mga kurakot.

Kadtong mga kwartang kinurakot nga gideposito  og mga bangko, mahimong mapugngan ang dinaliang pagpagawas niini ug dili na basta-basta mataguan, ug mahimo kining gamitong ebidensiya sa gihimong imbestigasyon kontra kurapsyon.