EDITORYAL - Lifestyle Check

Lifestyle check. Mao ni ang gustong mahitabo sa katawhan sa ilang tagsa-tagsa ka mga lokal nga opisyales ilabi kadtong makaduda na kaayo ang kalit pagkadato human sila nakalingkod sa gobiyerno. Apan husto ba kini ug manugot kaha sila?

Husto kini kun ang mga opisyales mismo maoy moboluntaryo nga paablihan ang ilang mga pinansiyal nga estado. Kanang buksan nila sa publiko aron masusi kung diin gikan ang ilang mga bahandi.

Apan sa mga dili gustong utingkayon ilang mga bahandi ilabi na ilang kwarta diha sa mga bangko, lisud kining buhaton gawas nalang kung dunay mando gikan sa korte, nga mahitabo lang usab kung duna nay kasong gipasaka batok sa maong mga opisyal.

Ang pangutana nalang, mosugot kaha sila? Unya kung manugot, sigurado ba kaha nga kanang ilang ipakita sa publiko mao gyuy tinuod? O basin dunay mga sekreto sab silang tagoanan sa ilang mga bahandi?

Dili man sab hinuon tingali bati nga ipaubos sa lifestyle check ang mga opisyal karong panahona nga pwerteng grabahe na gyud sa kurapsyon diha sa gobiyerno.

Syaro kanang ubang kawani sa gobiyerno wala makaila o wala makabantay sa ilang kauban sa trabaho namungingi na sa mga alahas ug dunay mga sakyanan nga parehas ra man unta sila og posisyon ug sweldo?

Makahibulong gyud, ilabi na kun ang ilang trabaho naglambigit og mga transaksyon nga pwedeng padangugan og kwarta ilawom sa lamesa.

Basta dili lang gyud sagulan og pamolitika, maayo ang tumong aning lifestyle check kay pagpakita kini kun unsa ka matinu-anon sa ilang panerbisyo ang mga opisyal.