Mater Dolorosa

Human sa pangilin sa Pagpasidungog sa Krus atong saulogon human niini ang piyesta sa Mater Dolorosa kun ang Inahan sa Kasakit. Dinhi sa Sugbo bugtong ang Ronda lamang ang nagdala ug nagsaulog ning maong debosyon. Kay naa man pud ang mga patuo tuo nga kun kini kuno ang atong debosyon magsunod ang mga kasakit ug pag-antos sa atong kinabuhi. Apan makaikyas ba gyud kita sa kasakit?

Atubangan sa Krus diin nagbitay ang iyang anak, ang atong mahal nga Inahan nibati og tumang kasakit ug kasubo. Ang kanhi bata nga gidala dala niya sulod sa siyam ka mga bulan ug iyang gialimahan sulod sa hataas nga panahon ang ania sakiton lamang ug patyon mismo sa iyang atubangan. Ang nakapait mao nga siya mismo isip inahan walay nahimo aron panalipdan ang iyang inahan gikan sa mga mabangis nga mga tawo.

Lisud kini nga kasinatian. Bisan kinsang inahan ang maglisud pagdawat niini. Apan wala siyay mahimo niadtong panahona gawas sap ag-unong sa iyang anak nga himatyon ug nagtinga niadtong mga panahona. Kinahanglang magmalig-on siya aron ang iyang anak mopanaw nga dili mabalaka sa kahimtang sa iyang inahan nga gitugyan ngadto sa suod niining higala ug tinun-an.

Sa makadaghang higayon ang mga inahan ang nakasinati sa susamang mga alantuson. Daghan sa mga anak nga nahisalaag. Daghang mga anak nga gipamatay sa mga pintas nga mga tawo. Daghang mga anak babaye ang giamong amongan sa mga dukirok ug mga adik. Daghang mga kabataan ang gipahimuslan sa mga sindikato ug hingwarta nga mga tawo. Ang mga inahan nga naapektuhan ang walay laing mahimo gawas sa pagpatulo sa ilang mga luha. Mga luha nga usahay makawang lamang.

Apan ang gipakita sa Mahal nga Birhen maoy magdapit unta kanato nga mamahimong malig-on panahon sa kagul-anan ug malaumon panahon sa madulom nga kinabuhi. Kun dili man gyud nato makaya ang gibug-aton sa atong mga suliran ug kasakitan mosangpit kita kang Maria aron ang iyang mga gakus maoy mohupay sa atong mga unos.