Dili mopadayon sa pagpalit sa property

Dear Atty. Divine,

Ang akong igsuon gibaligyaan og house and lot og installment ang pagbayad niini. Nalatid sa ilang Deed of Conditional Sale nga bayran ang property sud sa napulo ka tuig. Mibayad sab siya og 20% nga down payment ngadto sa seller. Apan gipuy-an na sa akong igsuon ang property kay ang sabot nila rent to own. Nalatid sab sa ilang kontrata nga kun mapakyas siya sa pagbayad sud sa tulo ka buwan mamahimong i-terminate ang contract ug di na niya mabawi ang iyang gibayad kay magsilbi  daw to siyang abang kay mi-occupy man siya sa property. Karon, wa makabayad ang akong igsuon sud na sa upat ka buwan. Mihulga ang seller nga i-terminate ang kontrata ug dili na daw makuha pagbalik ang nabayad na sa akong igsuon. Ang akong pangutana kun makapangayo ba og refund ang akong igsuon kon dili niya ipadayon ang pagpalit sa maong property? Daghang Salamat. —Teresa

 Dear Teresa,

Ang gipirmahan sa imong igsuon mao ang Contract to Sell kay gipalit man niya ang property pinaagi sa data-data. Basi sa Article 1486 sa atong Civil Code, kini nagkanayon nga kun ang kondisyon sa kontrata naglatid nga ang installments or rents nga gibayad dili na mamahimong bawion sa lessee or buyer, balido kini basta reasonable ang amount ug dili unconscionable or sobra ra kayo. Busa magdepende kini kun pila nay nabayad sa imong igsuon. Kay kun ang iyang gibayad matag buwan, gamay ra sab, makonsiderar ra sab kini nga bayad sa iyang abangan. Mismo ang Korte Suprema sa ilang desisyon sa kaso sa Spouses Godines vs. Sps. Norman (GR 225449, Feb. 26, 2020), kini nagkanayon nga kun gi occupy na sa prospective buyer ang property then na deprived na ang owner sa paggamit sa property, busa, ang pagbayad sa reasonable nga rental sa property makonsiderar sab nga bayad sa owner sa mga higayon nga wa niya magamit ang iyang property. Thank you and God Bless. —Atty. Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.