Marcos maoy responsable
Usa ka semana human gipahibawo ni Presidente Ferdinand Marcos Jr. ang iyang plano sa pagtudlo og independenteng mga imbestigador sa binilyon ka pesos nga kawat sa flood control projects, nga imbes mosulbad nipasamot sa problema sa baha, nipahibawo nang Malakanyang sa pipila nga napilian.
Giilang mga sakop sa Independent Commission for Infrastructure (ICI) silang kanhi Public Works and Secretary Rogelio Singson ug Rossana Fajardo, country managing partner sa SGV and Co. Gitudlo sang special adviser ug imbestigador si Baguio City Mayor Benjamin Magalong. Wala pay hisgot kon kinsa ang pangulo.
* * *
Wala mosulti ang Malakanyang kinsay gitanyagan. Pero nipasalig nga nganlan na karong Lunes. Gibutyag sa mga tinubdan sa palasyo ang mga ngalan nilang Retired Suprema Court Senior Associated Justice Antonio Carpio ug Retired Associate Justice Estela Perlas-Bernabe.
Niangkon nga gitanyagan og puwesto sa ICI pero nibalibad na si Bernabe nga gitudlong independent director of SM Prime Holdings Inc. human ni-retiro niadtong Mayo 2022. Wala pay pamahayag si Carpio kinsa nagpabiling aktibo sa sa nagkalainlaing kawsa apil nang pagkondenar sa eskandalo sa flood control projects human ni-retiro niadtong Oktubre 2019.
* * *
Ang presensiya nilang Singson ug Magalong sa ICI, labi na kon maapil si Carpio, makatabang sa pagpapas sa pagduda nga paukyab rang pasalig ni Marcos sa pag-imbestigar ug pagsilot sa mga responsable sa anomaliya. Ilang kaligdong ug katakos mohupay sa mga panagana nga walay igong ngipon ang ICI batok sa labing dagkong mga opisyal sa gobyerno nga gidudahang maoy mga utok sa kinawatay.
Pero ang suporta sa publiko mag-agad sa aktuwal nga labok sa ICI. Nga gipasalig sa Malakanyang nga molihok na sunod semana.
* * *
Andam ba si Marcos nga mosakripisyo sa iyang ig-agaw nga si House Speaker Martin Romualdez? Kay kon kapamatud-an nga labing dakog paak ang mga kongresista, imposibleng wala siyay labot.
Mas lisod nga pangutana: Moatubang ba siya kon isupina sa ICI? Kay kon tinud-on, ang imbestigasyon mosangko niya. Bisan sa iyang kasuko sa ghost projects ug paghilak sa kalisod sa kahimtang sa mga biktima sa baha kon ikumparar sa kahayahay sa mga politiko, kontraktor ug mga opisyal sa DPWH, ang presidente maoy nipirma sa 2025 budget nga nitugot sa bastos nga kinawatay.
* * *
- Latest
