Air ambulance makadugang sa chance

Human sa makaluluoy'ng hitabo sa inahang kaanakon na, Airish Comaling, kinsa nagpa-admit sa Carcar City Provincial Hospital, pero gipasa-refer ngadto sa Cebu South Medical Center (CSMC) kay tabangonon na kaayo ang kahimtang (ang fetus anaa sa distress nga status), diin gipanganak man tuod ang bata pero wala nay kinabuhi, unya misunod sab pagkamatay ang inahan, nakahunahuna gilayon ang atong Cebu Governor Pamela ‘Pam’ S. Baricuatro nga unta makabaton og air ambulance ang Sugbo aron mas mapadali ang pagbiyahe-abot niini sa halayong ospital.

Gikaguol-gihilakan kaayo ni Gov. Pam kining hitaboa.

Gipaimbestigahan niya kini ug dili siya magpanuko paghatag og sanction sa mga hingtungdang kawani o doktor nga mamatud-ang sad-an. Gikan sa 3 ka sakong bugas, groceries, P10K funeral assistance ug ngadto na sa personal nga tabang, kining tanan gihatag sa manggiluy-ong gobernador ngadto sa mga nagbangutang tagtungod. Ingon niini siya kamanggihunahunaon-kamapinanggaong inahan!

Gani, padugangan pa niyag obstretician-gynecologist OB-Gyne ang pampublikong ospital sa kalungsoran. Ug pamutangan kadtong mga wala pa. Sanglit, buot niyang maasikaso dayon ang mga tabangonong pasyente nga dili na kinahanglang mobiyaheg layong siyudad, diin tungod sa kataas oras sa daginotong yugto nga kini maoperahan unta dayon, namatay hinuon.

Dili gusto si Gov. Pam nga ang nahitabo ni Airish ug sa iyang anak, masubli. Hinungdan, maningkamot siyang makabaton og air ambulance ang Sugbo. Kay kini dako kaayog ikatabang panahon sa emerhensiya. Apan ang usa ka brand new helicopter ambulance mahal kaayo. Sanglit, gikan man sa $8M-$30M ang presyo. Ug may igo bang pundo ang Kapitolyo nga makasapar niini?

Hinuon, kon helicopter lang, anaa ra sa $500K (kinabaratohan) ngadto sa milyonmilyon nang dolyares. Pero makabuktot gihapon ang presyo, uy! Gawas kaha, kon may bigtime businessmen nga Samaritanhon ang kasingkasing ug daling makuhit aron kining maong pangandoy matuman.

Ang air ambulance makapadugang sa kataas sa chance nga maluwas ang tabangonong pasyente, kinsa nagkinahanglag dinaliang operasiyon. Atong nasod, anaa na bay air ambulance?

 Kaanugon, nga niining administrasiyong Marcos, dili masubay kon asa paingon ang trilyones niyang giutang matag tuig? Kay kon gidapat pa lang kini sa hustong dapatanan ug puhunanan, segurado, makapalit unta kitag usa.

Apan ning gipakita niyang pagpamunoan, kanus-a pa kaha kita makausa?