Daghang badlongon

Dili pa lang dugay nabaniog ang linuog nga pagpatay kang Charlie Kirk ang giisip nga Christian conservative.

Kining maong kasinatian ug panghitabo ang nihulagway nga bisan sa ngalan sa baruganan ug relihiyon ang tanan dili na gyud luwas ning mga tungora. Kay daghan ang buot mopatay ug magpakamatay sa ideolohiya nga kun buot hunahunaon halayo sa kamatuoran ug makadaut sa kinabag-an.

Daghan ang nahimong panatiko sa sayop nga pagtulon-an ug baruganan.

Dili garantiya nga kun anaa ikaw sa kamatuoran daygon ikaw sa kadaghanan.

Mahimong kining baruganan maoy hinungdan sa imong hinanaling kamatayon.

Ang nakapait kay hangtud karon ang nipusil patay kang Charlie ang wala pa gyud hisakpi.

Samtang daghan pa ang naglakat sa mangitngit nga dalan sa kabakakan daghang kinabuhi sa gihapon nga mausik.

Daghan pud tingali ang makaingon sa kaugalingon nga mas safe diay kun subayon ang simang nga dalan sa kinabuhi sanglit kini man ang gisubay sa kadaghanan karon ug malipayon kaayo sila tungod niini.

Ang mga panghitabo sa atong palibot karon nisalamin lamang sa tinud-anay nga mga panghitabo sa galamhan sa matag tawo.

Daghan ang maglisud pag-atubang sa mga kamatuoran kalabot sa kaugalingon nga tungod niini ila kining tabonan sa mga bakak ug dili matuod kay anaa man ang comfort.

Usahay man gud ang kamatuoran sakit ra kaayo. Apan bisan pa man kun sakit ang kamatuoran, at least maghatud kini og kalingkawasan.

Sa mga panahon karon usahay daghan ang mo compromise aron dili matay-og ang komportable nga estado ug kahimtang sa kadaghanan ug nakapait mao nga daghan usab ang nipahimulos niini alang sa ilang kaugalingong katagbawan apan gisakripisyo ang kaayohan sa kadaghanan ug nahimong usa ka dakong urom ang panginahanglan sa kamatuoran.