EDITORYAL - Ang sakit nga Kurapsyon

Dili lang ang Pilipinas ang dunay problema sa kurapsyon. Mao kini ang pirmeng reklamo sa katawhan batok sa ilang gobiyerno ug sa ilang mga opisyales nga nanglingkod sa kagamhanan.

Didto sa nasud sa Indonesia, gi-ransack sa mga tawo ang ilang parliament, ang mga pinuy-anan sa ilang mga magbabalaod, hasta ubang buhatan sa gobiyerno tungod sa ilang kapungot sa kurapsyon sa ilang mga opisyal.

Nagubot og maayo sa Jakarta human nagkasakitay na ang mga nagprotesta ug ilang kapolisan, dunay nangaangol ug dunay nakalas, samtang daghan ang naaresto. Didto sab sa nasud sa Nepal, niulbo ang bayolenteng protesta batok sa mga opisyales ug sa ilang gobiyerno, tungod gihapon sa kurapsyon ug ang suway pag-ban sa social media diha sa ilang nasud.

Gipangsunog gyud sa mga tawo ang ilang mga government buildings, pisikal nga gipangdapatan ang ilang mga opisyales sa gobiyerno, ang uban gihuboan, ug gipangguroy diha sa karsada. Ang kagubot niresulta sa kamatayon sa 19 ka tawo.

Dinhi sa Pilipinas, bilyones ka pesos nga kwarta sa flood control projects ang gikagubtan karon human nasakpan ang salawayong pagpangawat sa mga opisyales ug sa ilang mga kakunsabo sa pundo para niini.

Mabati kining kayugot sa katawhan ngadto sa mga magbabalaod gikan sa Senado, Ubos Balay Balauranan ug labaw sa tanan sa Department of Public Works and Highways pinaagi sa pagpadayag diha sa social media.

Apan sukwahi sa Indonesia ug sa Nepal, kaning pagkasakop sa kurapsyon sa flood control projects dili yanong “whistleblower” o grupo ang tinubdan.

Kondili, ang mismong lider sa Pilipinas nga si Presidente Ferdinand Marcos Jr.

Siya maoy nibutyag ug nipublikar aning mga iregularidad. Hangtud nangabulgar ang pipila ka opisyales sa DPWH, mga senador ug kongresista pinaagi mismo sa ilang mga kakunsabong mga kontraktor nga ilang gipangbulsa ang pundo.

Gilahugay na hinuon ang liderato sa Senado, gipangkasohan na ang ubang mga nalambigit ug gipangkuykoy pa ang uban,

Maayong paabuton lang sa katawhan ang resulta inay nga guboton ang nasud nga makaapektar sa pagpuyo sa tanan. Kaning kurapsyon mura og sakit nga maoy mopatay sa nasud kun dili masanta.