Kun ang kasuko maoy molihok

Daw nahimong hudno ang Nepal sa dihang nipagawas ang mga batan-on matud pa, sakop sa Gen. Z nga henerasyon. Kining maong kabatan-onan ang nibati og tumang kasagmuyo apil na ang kasuko gumikan sa gihimo sa mga politico sa ilang nasud.

Ang maong kapintas ug pagsunog niresulta sa kamatayon sa pipila lakip na ang asawa sa prime minister nga niluwat sa iyang pangatungdanan. Kining maong kagubot nga niresulta og kadaut sa mga kabtangan ingon man panginabuhian ang mahimong lama sa kahugnoan sa Nepal.

Kining maong social unrest nila mahimong opening sa mga panghitabo nga dili maayo ug makaayo sa ilang nasud. Vulnerable sila sa bisan unsang pag-atake. Sa laing bahin ang maong hitabo nisalamin lamang sa kahimtang sa matag tawo nga diskontento dili lang sa gobiyerno kondili mismo sa ilang kaugalingon.

Kun sa pagtuo sa kadaghanan nga nakuha ang kaangayan, sayop kita sanglit ang kapintas dili mahimong sulbaron pinaagi sa laing kapintas.

Mamahimo hinuong buhi ang liyok sa kapintas ug padayon kining mahitabo.

Mahimo kitang mahisama sa atong mga malupigong mga pangulo nga nipahimulos sa bahandi sa atong nasud ug niilad kanato pinaagi sa malimbongong kamanggihatagon.

Ug daghanan kanato ang nahiuyon ning maong pamaagi bisan pa man kun kini nagkahulogan og kalaglagan dili lang sa pipila kondili sa kinabag-an kanato. Kun mosunod kita sa pamaagi didto?

Ambot lang kun unsa ang atong dangatan. Unta mahimo kining pasidaan nga magtarong sa atong panaw isip nasud apan sa laing bahin maghimo usab unta kining pasidaan nga bisan unsa kahamili ang imong katuyoan dili gihapon sukaranan aron mogamit kita og hiwi nga pamaagi.