Pagpamugos kaamgid ra sa pagpanglugos

Niay angay hinuktokan. Pag-ingon ni Justice Secretary Boying Remulla nga sayon rang taktakon si kanhi former Bucor chief General Gerald Bantag sa puwesto, kinsa usa ka tinuoray’ng Duterte war on drugs’ warrior, kini natuman.

Dihang siya mipasiatab nga madayon ang pagtugyan ni kanhi Presidente Rodrigo Roa Duterte (PRRD) ngadto sa International Criminal Court, kini natuman.

Unya, dihang misulti siya nga ma-impeach si Vice President Sara ‘Inday’ Z. Duterte, na-impeach g’yud kini sa Kongreso. Ingon niini kagamhanan si Boying.

Maayo na lang, kay pag-abot niini sa Senado, aduna pay pipila ka mahadlokon sa Diyos nga senadores ug sa Korte Suprema, pulos anghel tanang mahistrado, kinsa mipakanaog sa pinale nilang desisyon, nga ang pag-impeached ni Inday sa Kongreso, unconstitutional-illegal. Busa, nabasura.

Sanglit, pakyas man ang administrasiyong Marcos pag-demolish ni Inday gamit ang scripted nilang Plan A: (Planted P125M-Confidential Fund), Plan B: Pagpa-impeach ni Inday sa Senado ug Korte Suprema, ania na pod sila sa ilang ikatulong duso, Plan C: Paghimog Ombudsman ni Justice Secretary Boying Remulla aron hingpit mapapas sa politika tanang Duterte.

Diin, daghang abogado mialma-padayag. Nga dili angay niining puwestoha si Remulla kay may pending criminal cases pang nakaharang. Kinahanglan, makasumiter siyag Ombudsman clearance ngadto sa Korte Suprema, ayha pa maapil sa short list of Ombudsman nominees.

Si Senador Imee Marcos mitug-an. Iya nang giunhan pagpayil og criminal charges si Remulla ngadto sa Office of the Ombudsman. Kay siya nasayod sa dautang mga plano sa kasamtangang administrasyon batok kang Inday. Matod niya: “Ipipilit nila na si Boying ay maging Ombdsman para ipakulong si VP Inday Duterte bago mag- 2027. At hindi lang si Inday Sara, kundi lahat ng mga Duterte, kaalyado ng mga Duterte. At baka, pati ako!” Busa, iya gyong alihan si Boying kutob sa iyang makaya.

Apan wala kini makapaluya ni Boying, kinsa mipakitag pagpamugos gamit iyang pagkagamhanan ug dili mohunong hangtod dili siya mahimong Ombudsman. Pero yuna, dili ba ang pagpamugos kaluha man sa pagpanglugos og babaye, diin kiniing maong kaso, non-bailable? Nan, niining higayona nga wala pa makahimong heinous crime si Boying?

Hoy, mga magbabalaod, labi na atong kapolisan-kasundalohan, mangiyugpos ba lamang gihapon kamo? Intawon, salbara atong nasud!