Unsay buhaton aron mahatagan og child support

Dear Atty. Divine,

Nagbuwag mi sa amahan sa akong anak lima ka buwan na ang nakalabay. Ako siyang gibiyaan human nako nasuta nga aduna siyay laing babaye, 5 years old na ang among anak ug dili mi kasal sa amahan sa akong anak. Ang akong pangutana kun unsay akong buhaton aron mahatagan og financial support ang akong anak gikan sa iyang amahan? -- Thelma

* * *

Dear Thelma,

Mamahimo nga imong padad-an og demand letter ang amahan sa bata alang sa imong pangayuon nga sustento. Mamahimo sab nga magpatabang ka sa barangay diin siya nagpuyo aron siya ipatawag. Kon di siya motunga sa barangay, mamahimo nga moduol ka og abogado aron maoy mopadala kaniya og demand letter. Kun dili gihapon siya motagad sa imong demand letter gikan sa abogado, mamahimong modangop ka sa korte pinaagi sa pagpasaka og kasong Criminal basi sa Republic Act 9262 (Anti-Violence Against Women and their Children) kay ang pagdumili niya sa pagsustento sa  imong anak, usa ka kalapasan sa maong balaod ug usa kini ka criminal offense ug mamahimo siyang mapriso kun mapamatud-an. Mamahimo sab nga mopasaka ka og kasong Civil alang sa pagpangayo lang og suporta sa bata og ang korte na ang mopatawag kaniya og  momando kaniya sa paghatag og sustento sa inyong anak matag buwan. Thank you and God Bless!

Atty. Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.