Naglinumsanay na ang mga buaya

Kini karon ang nahitabo sa mga kontrabida sa true to life drama sa flood control project. Mikanta na ang ubang mga nalambigit, una ang Discaya couple nga unang mitagak sa mga sakop sa Kongreso ug sunod mao ang kanhi DPWH Assistant District Engineer sa Bulacan nga si Brice Hernandez nga milaglag sa mga senador. Nagkanindot ug nagkakulba hinam ang drama nga mipilde sa mga telenovela sa telebisyon.

Puslan man nga naanod na sila sa baha sa kontrobersiya, gibitad na nila karon kadtong susama nila nga nakasuyop sa kuwarta sa kagamhanan nga anaa naglingkod sa Ubos Balay Balauranan ug Senado. Sa mga Discaya, nayabo naman ang ilang negosyo busa nagmarka bahala na sila karon kutob sa ilang maamong ila gyud bitaron, damay damay lang gyud sama pud niini ang ghimo ni Hernandez.

Gilambigit ni Hernandez silang Senador Jinggoy Estrada ug Senador Joel Villanueva nga gipanghimakak usab niining mga tawhana. Apan dunay mga supporting photos ang kanhi DPWH Official nga nagpakita kang Estrada ug sa nataktak nga district engineer sa Bulacan nga si Alcantara nga daw suod kaayo.

Hinuon gipanghimakak ug gikondenar ni Jingoy ang pag expose ni Hernandez. Ingon usab niini ang pagpangugat sa mga congressmen nga giduhig sa mga Discaya apil na silang Congressman Zaldy Co ug House Speaker Martin Romualdes. Dili man direkta pero mitumaw nga sila matud pa ang gigamit aron makakawat sa kwarta.

Alegre kaayo kay ang mga nag-imbistigar ang labaw usab nga imbestigaron. Ambot lang kong duna pa gyud kiniy padulngan ang tanan.

Salig lang gyud ta ani sa pagkakaron pero mangandam lang pud basin madismaya ra sa resulta.

Makaingon ta nga kini ang labing dako nga kauwawan sa nasud kay dili lang usa kon dili halos tanan seguro nga mga magbabalaod nga tighimo sa balaod ang niguba sa balaod nga ilang gipanday tungod sa kahakog sa bahandi.

Ang ahensiya sa kagamhanan nga gitahasan sa pag ayo sa mga nangagusbat nga imprastraktura mao man ang niunay sa pag guba tungod gihapon sa salapi.

Dili lang binilyon ka pesos kondili miabot na matud pa sa kapin trillion pesos ang nasulod sa bulsa sa mga kurakot nga anaa sa kagamhanan.

Kong gigamit lang unta kini sa tinarong nga pagsulbad sa baha, unta wala nay mag antos sa baha karon kay seguradong nindot ug pulido ang pagkahimo sa mga proyekto.

Sa pagkatribokar sa halapad nga kurapsiyon walay miangkon nga nalambigit pulos nanghunaw, nagpaka inosente bisan namurot ang tiyan sa pagtukob sa kwarta sa katawhan.

Hilabihan kadaghan sa kwarta ang kapahimuli sa katawan kay gitukob sa mga buaya nga sa pagkakaron nagsugod na sa pagkinan-anay kay nabisto naman.

Sa akong giingon sa nahaunang lindog nga nibilib ko ni PBBM niining iyang pagbutyag sa halapad nga anomaliya.

Kay bisan nasayod siya nga mosumbalik sa iyang administrasyon problema apan wala niya kini baliha ug giligsan niya bisan kadtong iyang mga kaalyado ug kadugo. Apan mas mobilib kita kong naay masilotan apil na ang iyang mga kadugo kong nalambigit sa kurasyon. Hinaut dili lang kini drama.