Sala ba ang pagtug-an sa kamatuoran?

Matud pa ni kanhi Gov. Gwen Garcia nagpakahilom na man unta siya. Unya nganong gisigehan man gihapon siya'g tira sa mipuling Cebu Governor Pamela ‘Pam’ S. Baricuatro?

 Hinungdan, nga siya mibawos-labok sab. Niya pa: “Ang unang State of the Province Address (SOPA) ni Baricuatro pulos pamakak-panuis-panaot address.” Ug mitambag pa, nga ang maayong tutokan ni Pam mao ang pagkat-on una sa pagdumala sa probinsiya, imbes magsigeg sayaw sa Tiktok.

Unya, mihisgot! Nga kon kahinumdoman, paglingkod niya isip gobernador sa Sugbo niadtong tuig 2019, wala gyod siya misaway sa administrasiyon ni kanhi Gobernador Hilario ‘Junjun Davide III, deretso siya sa iyang trabaho ug mipahimutang dayog direksiyon, pagpangapkap og mga paagi aron iyang mapalambo ang probinsiya.

Natural, sa kaligdong-ka-honest-kalimpiyo sa pagpangalagad ni Junjun, unsa pa bay ikasaway-ikamulo sa bag-ong gobernador nga mopuli kaniya? Gani, didto man sa iyang pagpangatungdanan, misugod pagkadato ang probinsiya sa Sugbo. Diin, dili kawad-on ang gibilin ni Junjun. Kondili, kabuhong!

Ug bahin sa giingon ni Gov. Pam nga napabayaan ra ni kanhi Gov. Gwen ang provincial and district hospitals, si Garcia namahayag, nga migahin siya'g pundong minilyon ka pesos alang sa 16 ka provincial and district hospitals uban ang paninguhang mapataas-an ang level status sa naasoyng mga ospital ug mabutangag hemodialysis centers.

Usab, paghisgot sa P1B kapin nga Special Education Fund, diin wala magamit, giklaro ni Garcia, nga mas gipili niya ang paggamit niini alang sa mga importanting katuyoan, sama sa feeding program sa mga estudyante ug sa ilang mga school supplies.

Ang pangutana, natilawan ba sa mga Sugboanong pasyente ang kaandam moatiman gilayon sa atong provincial and district hospitals panahon sa ilang panginahanglan?

Ang mga estudyante, nakatagamtam ba tanan sa feeding program ug libreng school supplies ni kanhi Gov. Gwen? May bag-ong eskuylahan bang napatukod aron ang ubang tinun-an nga usahay anha na lang magleksiyon sa gawas, masulbad?

Kon kining tanan ilang nasinati ug nakita sa katawhan ubos sa kanhi niyang pagpamunoan, nganong si Gov. Pam man maoy midaog sa miaging eleksiyon? Usa baya kini ka matang sa sukdanan, kon kinsa kanilang duha: Pam ug Gwen ang mitug-an sa tinuod?

Ug sala ba diay ang pagtug-an sa kamatuoran?