Survival

Mipiyait na ang mga Discaya sa nagpadayon nga imbestigasyon sa Senate Blue Ribbon Committee.

Gitugan ni Pacifico "Curlee" Discaya II nga adunay eskima sa komisyon sa proyekto sa gobiyerno diin moabot kini gikan sa 25 ngadto 30 porsiyento ang gikuha sa mga taas nga opisysal sa matag projects nga ilang makuha sa gobyerno.

Ginganlan ni Mr. Discaya sila si House Speaker Martin Romualdez, Tsirman sa Committee on Appropriations nga, si Congressman Zaldy Co ug Congressman Roman Romulo. Giasoy ni Curlee Discaya nga 25 porsiyento sa budget sa proyekto ang mapunta ngadto nila ni House Speaker Martin Romualdez ug Congressman Zaldy Co apan madugangan pa kini og 5 porsiyento alang kang Congressman Roman Romulo kun ang budget sa proyekto gikan sa budget insertion.

Giingon ni Curlee Discaya nga open secret kini nga eskima.  Giklaro ni Discaya nga kun ang budget sa proyekto gikan sa National Expenditure Program dili makadawat sa iyang 5 porsiyento si Congressman Roman Romulo.

Sa pagpiyait ni Mr. Discaya ug sa pagduot niya nila ni Romualdez, Co ug Romulo plano ba niini nga mahimo siya nga testigo sa Estado aron makalingkawas sa mga kaso nga posibleng ipasaka batok kaniya ug sa iyang asawa? Klaro kini nga para survival sa mga Discaya.

Dili maayo nga magpailad ang gobiyerno sa mga Discaya.

Dili maayo nga paiskapohon sila sa ilang tulubagon sa pagpakigkombuya sa mga kongresista ug opisyal sa DPWH sa pagpaburot sa ilang mga bulsa gikan sa panudlanan sa gobiyerno.

Kun tugotan man sa gobiyerno ang mga Discaya nga makalusot sa ilang tulobagon pinaagi sa paghimo nila nga testigo sa Estado maingon nato nga kakunsabo usab sa mga Discaya ang estado.