“Back job”

Wa pay tuig sukad nahuman ang rehabilitation ug pag-refurbish sa rubberized oval sa Cebu City Sports Center (CCSC) apan nangaukab na ang pipila ka bahin niini.

Migasto ang syudad og P54 milyones alang sa rehabilitation niini nga nahuman niadto lang Nobyembre sa miaging tuig. Apan 10 pa lang ka buwan sukad mahuman ang pag-ayo niini guba na pud ang track oval.

Ang executive director sa CCSC nga si Brando Velasquez kumbinsido nga substandard ang materyales nga gigamit sa kontraktor hinungdan nga dali ra kini kaayong naguba. Atol sa pagsusi ni Mayor Nestor Archival personal sab niyang nasaksikan ang dakong kalainan sa kasamtangan nga materyales nga gigamit gikan sa karaan nga materyales. Mas nipis ang rubber karon kun itandi sa original nga materyales.

Gipasusi pa ni Archival nabayran na ba ang kontraktor sa kinatibuk-ang kontrata, apan ang pasiunang pakisusi nagpakita nga 60 porsiento na sa kantidad sa kontrata ang nabayran sa dakbayan. Kun wala pa ni maimpas, siguradong wala pa ni hingpit ma turn-over sa kontraktor ngadto sa syudad.

Nga sa ato pa, mahimo pang maningil ang dakbayan gikan sa kontraktor sa palpak nilang trabaho. Ang angayang buhaton sa syudad mao nga pailisan sa kontraktor ang mga naguba nga materyales nga libre tungod kay angayang dunay warranty ang usa ka proyekto sa gobyerno.

Kun gikinahanglan, ipalangkat sa kontraktor ang tibuok oval og ilisan ang rubber sigun sa specifications nga gilatid sa bill of materials diha sa program of works sa proyekto. Ug ang labing importante angayang sigurohon sa dakbayan nga libre ni ug dili na kinahanglang bayran tungod kay klaro ni nga “back job” sa kontraktor.

Wala na kinahanglana ang plano ni Archival nga mogahin ang syudad og laing P100 million sunod tuig alang sa laing repair sa oval. Angayang unahon sa syudad ang pagpaningil og warranty gikan sa kontraktor.

* * *

Personal nga gisusi ni Archival ang laing proyekto sa Department of Public Works and Highways (DPWH) diha sa may M. Velez nga nakamugna og kahuot sa trapiko sa maong dapit. Matud sa mayor nga wala ni coordination gikan sa dakbayan.

Ang labing makapasuko mao nga gituyo og guba ang labihan pa kamaayo nga karsada aron ayuhon og usab. Alang sa mayor klaro ni nga pag-waldas sa buhis sa katawhan.

Dili na gyud madutlan og uwaw ang ubang mga opisyal sa kagamhanan nga bisan labihan ka dayag way kaikog sa mga magbubuhis.

Hinaot nakit-an ni sa mga opisyal sa Ombudsman Visayas nga sigurado ko nga apil sa mga naapektohan sa kahuot sa trapiko dihang dapita sanglit agianan man kini paingon sa ilang opisina.

Ug labaw sa tanan, hinaot ilang imbistigahon ni’ng tataw nga pagpanulis sa buhis sa katawhan.