Nalumos sa kurapsyon

Ang isyu sa kurapsyon sa flood control project usa lang sa daghan ug naghitak nga pagpangawkaw nga dugay na nga nahitabo sa atong nasud.

Kong tan-awon basin mumho lang kini itandi sa mas dako pa nga pagpahimulos sa kwarta nga iya sa mga magbubuhis.

Tanan nga ahensiya sa kagamhanan mao na kini ang gihimo nga nakapaburot sa bulsa sa mga tampalasan nga buaya nga mitukob sa tanang kwarta nga kapahimuslan unta sa mga tawo ilabi na kadtong tinood nga nagkinahanglan og tabang.

Nahimamat nako ang usa ka pamilya nga nagpuyo sa kilid sa tulay sa dakbayan sa Sugbo.

Siyam ang ilang anak ug duna na usay mga apo, ug hilabihan ka lisod ang ilang kinabuhi kay mamasura ug usahay dunay maluoy kanila hatagan sila og pagkaon. Bisan sa ilang kapobrehon napaeskwela nila ang ilang mga anak, gani anaa nay hapit makahuman sa criminology o mamahimong pulis.

Samtang nag-estorya kami, nalakbitan namo ang isyu karon sa kurapsyon nga nagpambigit sa binilyon nga flood control project.

Matud sa inahan nila nga unta nahiadto sa mga kabus ang kwarta dili na unsa sila mag-antos nga magligid sa yuta sa ilang pagpahulay.

Tinuod hayahay kaayo ang mga kurakot samtang ang mga kabus nag ilaid sa kalisod.

Pakit og sakit ang kahimtang sa mga tawong walang wala gyuy makuot nga kwarta samtang ang uban nagbanig sa kwarta nga dili sila ang tag-iya.

Ang kahimtang niining pamilyaha nagpakita sa nawong sa kahimtang karon sa atong nasud nga lisod kaayo tungod sa opisyal sa gobiyerno nga ang giapas mao lang ang kahum ug ang salapi.

Napul-an na ang mga tawo ug nakamata sa kamatuoran nga gigamit lang ang mga yanong lungsoranon sa personal nga tinguha niining mga opisyal nga padayong misuyop sa dugo sa katawhang Pilipinhon.

Ang nahitabo sa Indonesia mahitabo usab sa atong nasud kong moawas na ang pasensiya sa mga tawo nga mao nay mohimo og lakang nga masilotan ang si bisan kinsa nga nagwaldas sa kwarta gikan sa kaban sa mga magbubuhis. Duna nay mga grandstanding investigation apan duda ko kong duna kiniy padulngan, unsa man kabahin kini sa dakong drama apan inig abot aa panahon nga molihok na ang kwarta mokalit lang unya kini og kahilom ug dili gyud makab-og ang hustisya.

Puwera sa maayo halos mga magbabalaod adunay dark secret mahitungod niini, ayaw ko ingna nga traydoron nila ang ilang kaugalingon ug hukman nga sila sad-an.

Morag mahulog na hinuon nga expectattion versus reality, busa aron mahatagan kini og katumanan nga masilotan ang mga kurakot aron sa ingon dili na mosunod ang uban.

Kitang mga ordinaryong tawo manginlabot na kita sa pagsumbong sa mga anomaliya nga atong nasayran pahimuslan nato nga ang presidente mismo ang nisuka kanila mintras wala pa hingpit malumos ang katawhan sa nagbaha nga kurapsyon.