Insulto sa mga biktima
Bati nang daan ang pag-isnab ni kanhi Gobernador Gwen Garcia sa dul-an bilyon ka pesos nga ayuda sa National Housing Authority (NHA) para sa mga Sugbuanon nga nawad-an og mga balay tungod sa bagyong Odette niadtong 2021. Mas makapa-alarma pa gyod kay dili lang kadto ang iyang gihimo pag-apiki sa mga biktima.
Nasakpan sab ni Gobernador Pam Baricuatro nga gipakatulog lang ni Garcia ang laing usa ka bilyon ka pesos. Nga para unta sa pagpangandam sa Sugbo ug pagpanalipod ug pagtabang sa mga biktima sa mga bagyo ug ubang katalagman.
* * *
Ambot unsay atraso sa mga biktima. Imbes hatagan og simpatiya, giinsulto man hinuon ni Garcia. Gawas nga gihikawan sa tag-P10 mil kada pamilya gikan sa NHA, gitunglo pa gyod ang mga biktima nga dili kamao nga mogamit sa kuwarta.
Nipasangil si Garcia nga kon cash ang ihatag, mahurot lang sa sugal ug rebond. Ambot unsay sukaranan sa pagtuo ni Garcia nga ang mga naigo ni Odette makalimot pagpa-ayo sa ilang mga balay. Kay unahon ang, pasayloa nangita ko og pulong nga mas masabtan ni Garcia, pagpa-retoke sa ilang buhok.
* * *
Binuang ang palusot ni Garcia nga ang hinabang sa NHA moresulta lang sa kagubot. Kay masuko ang ubang mga biktima kon 72,209 ka pamilya ray hatagan. Niinsistir siya nga mas makiangayon kon tag-P2,000 ang ihatag sa 400 mil ka beneficiaries.
Ang hapsay nga pag-apud-apod sa hinabang sa NHA sa Lapu-Lapu City ug Mandaue City maoy ebidensiya nga mas tarung og panghunahuna ang mga Sugboanon: Nakasabot nga ang mga nawad-an og balay maoy giuna.
* * *
Gawas pa, ang listahan sa NHA beneficiaries gikan sa Office of Civil Defense (OCD). Base sa opisyal nga listahan sa mga biktima gikan sa mga mayor. Wala kaseguro ang NHA diin gikan ang lista nga gipamugos ni Garcia.
Sakto sab ang pagsalikway sa NHA sa pangugat ni Garcia nga gamiton ang iyang QR-coded cards. Kay mga nigamit sa cards nitiyabaw og mas daghang sipyat kay sa tsamba. Pananglitan, mga nakadaog sa “Sugbo Negosyo” nagkatibuwaag pagpangita sa mga tindahan nga nidawat sa cards. Ug nadunot ang P20 nga bugas humay sa Mandaue kay gilisudlisod sa cards ni Garcia ang beneficiaries.
* * *
- Latest
