Pagrelibo may kulba-hinam nga sumpay

Dihang mibuto ang masipang balita nga si kanhi Philippine National Police (PNP) Chief Nicolas Torre III gitangtang sa puwesto ug gipulihan ni acting PNP Chief Lt. General Jose Melencio Nartatez Jr., natay-og ang dughan sa katawhan sulod ug gawas sa atong nasod nga naabot sa makapakurog nga tinualsik niini.

May mga nakurat. Adunay mga nalipay. Ug anaa poy nakapanglingolingo, silang nakasabot kaayo nganong gibuhat kini sa administrasiyong Marcos?

Sa mga nakurat, sila dili makatuo nga mabuhat kini ni Presidente Bongbong Marcos Jr. (PBBM) ngadto kang Torre, kinsa maoy iyang alas ug daw hinanib ni Satanas, kinsa walay kukahadlok pagtugyan sa iyang kalag ngadto sa impiyerno dihang sa linuog nga paagi, iyang gi-martial law ang Kingdom of Jesus Christ ni Pastor Apollo C. Quiboloy, diin daghang nangaangol nga mga miyembro ug duna gyoy namatay.

Ug usab, sa iyang pagbinaboy pag-atratar ni kanhi Presidente Rodrigo Roa Duterte (PRRD), gikidnap atubangan sa katawhan ug unya iyang gidan-ok-tugyan pa gyod ngadto sa International Criminal Court nga wala nay hurisdiksiyon sa Pilipinas. Lamang aron maangkon ni Torre ang dakong promosiyon nga gisaad.

Tuod, milampos si Torre. Ug si PBBM pay miunay pagtunol niya niini. Unya, iya hinuong gitaktak? Mao nga sa mga diehard Duterte supporters (DDS) nga nangalipay, ayaw palabi.

Hinunoa, hinuktoki! Ang gipatigbabawng rason nganong nataktak si Torre sa pagka-PNP chief tungod sa overlapping of function (sa walay pupananghid, diin iyang gihilabtan ang trabaho sa iyang labawng opisyal nga dili iyaha).

Ug dili maoy resulta agig silot, sa iyang mga giatubang kasong kriminal sa KOJC Siege ug PRRD illegal ICC detension issues.

Hinungdan, nangatawo daghang pangagpas: may miingon, basin ibalhin si Torre sa pagka NBI director? May nagduda pod, basin hatagag bag-ong misyon si Torre: ‘ang hingpit pagdemolis sa mga Duterte aron wala nay Sara sa 2028 election?’

Ang kataw-anan, kay naa poy nagdamgo, nga si Torre mao kunoy palansaron pagka-presidente sa Pilipinas?

Hinuon, puro opinyon-pangagpas lamang kining tanan. Layo ra man o duol sa tinuod, walay bisan usa kanato ang nasayod.

Usa ra ka butang nga segurado – kining pagrelibo ni Torre, may kulba-hinam gyod nga sumpay. Gani, hinayhinay na man kining nanuyhakaw.

Unta, for good!