Pang-resign na mo!

Nahibawo ba mo nganong dunay mga kontraktor nga motuyo lang gyud paghimo og daghang construction companies nga sila ra’y tag-iya, nga pwede ra man unta kon usa lang?

Para sa mga wa masayod, paagi kini sa mga kwartahan nga kontraktor aron masiguro nga sila gyud ang makakuha og daghang project sa kagamhanan kay ang maong mga construction companies moapil man kuno sa Bidding sa projects.

Lainlain ang kantidad nga ilang itanyag, dunay daku, dunay gamay, apan ang kinagamyan nga kantidad, sigurado na gihapon ang ganansya kay daghan man sila og mga paagi nga himoon.

Unya, mahibaw-an man na nila kon kinsa ang ubang kontraktor nga moapil sa Bidding, ug kadtong kwartahan nga kontraktor mopatawag og miting sa maong mga bidders ug tanyagan kini og dakung kantidad.

Sa ato pa, kadtong ubang bidders hatagan ra nila’g kwarta bugti sa paghimo nila nga dakuon nila ang prisyo nga ilang i-Bid sa maong proyekto sa tumong nga dili kini mapili kay ang labing gamay man og offer ang modaog sa Bidding.

Unya kadtong modaog sa bidding sa proyekto, mogahin pa gyud sila og kwarta ngadto sa uban nila nga hataganan, wa na ta masayod kon kinsa ang ilang hatagan. May pagduda ta kon kinsa ang hatagan nila, apan wa tay ebidensya.

Mao nga di na ta makapaabot nga matuman nila ang design ug specification sa project kay gawas sa gitagana nila nga ilang ganansya, naibanan na man sa gipanghatag nga kickbacks.

Didto sa Luzon, dunay district engineer sa DPWH nga nadakpan sa entrapment operations sa NBI nga misuborno unta sa usa ka kongresista, mitug-an nga apil sa makadawat og kickbacks sa Luzon ang mga opisyal sa DPWH ug ang kongresista mismo nga maoy mopili sa kontraktor.

Swerte lang ta dinhi sa Cebu kay mora’g wa manghilabot ang mga kongresista sa pagpili og mga kontraktor nga motrabaho sa mga proyekto nga gipangitaan nila og budget, ug ang DPWH ra maoy nagpahigayon sa Bidding sa proyekto.

Mao na diha nga daghan kaayong mga opisyal sa DPWH nga makwartahan gikan sa mga kickbacks nila sa kantidad sa mga proyekto nga ilang gidumala. Matud ni Senador Panfilo Lacson duna gani district engineer sa Luzon mapilde og P3 Milyones sa Casino bisan og ang sweldo niini tag P56,000 ra ang buwan.

Tungod niini, gisuportahan nako ang awhag sa bag-ong DPWH Secretary nga si Vince Dizon nga ang tanang opisyal sa ilang ahensya sama sa Undersecretary, Assistant Secretary, Division Heads sa DPWH Central Office, mga regional directors ug district engineers, mo-submit sila og Courtesy Resignation.

Pero tan-aw nako wa pay mituman sa hagit ni Secretary Dizon. Kadtong mga buotan ug wa malambigit og mga kurakot, ipabilin ra man sa pwesto kay si Dizon nakakuha na man og kasayuran kinsa sa mga opisyal sa DPWH ang nalambigit sa ilegal nga kalihokan.