EDITORYAL - Sinulog 2026

Limitahan na ang gidaghanon unya sa mga contingents o entrante nga makaapil sa Sinulog Grand Parade ug Showdown karong sunod tuig. Maayo ba kaha ni o dili?

Sa nanglabay nga mga selebrasyon sa Sinulog dinhi sa Cebu City, pwerteng daghana sa mga gustong makaapil aning pinaka-grandiyosong kapistahan sa tibuok Pilipinas.

Pilahan gyud pirme sa mga gustong makaapil ang parada ug ang kompetisyon, apan tungod sa kadaghan, maabtan na og tungang gabii usahay kadlawon ayha pa mahuman.

Apan bisan pa man og limitahan ang gidaghanon, dili man gyud kini ang problema. Kondili ang pag-manage sa tanan, gikan sa programa, crowd control, ug mga kalit-kalit nga mga kinahanglang usbon tungod sa mga aberya nga wala maapil sa napangandaman.

Sa nanglabay nga mga Sinulog, magamay man o daghan ang nangapil, ang pagkahan-ay ra gyud sa  mga contingents ug gipaspason nga makasugod sa Grand Parade sa Sinulog Route ang problema.

Kun dugay makasugod, dugay sab gyud mahuman. Usa pa, siguradong modagsa gyud ang mga tawo nga gustong makatan-aw.

Kun kuwang og kontrol sa mga tawo kay daghang maglabang-labang sa rota, malangay gyud ang parada ug maapektahan ani ang presentasyon o grand showdown diha sa Cebu City Sports Complex.

Gawas pa niana, dapat apilon sa limitasyon ang gihabugon o gitas-on sa mga floats ug mga props aron dili malangan sa pagsulod ug gawas diha sa CCSC, kay mao kini ang usa hinungdan nga nadelatar ang presentasyon kay nabara diha sa entrada ug sa exit ang ubang contingents tungod sa ilang mga dayan-dayan. Unta naleksyon na ang mga organizers sa mga nahitabo sa nangaging mga Sinulog ug ilaha kining usbon o tarungon sa 2026.