Gugma ug kamatuoran

Basaha: Jn. 8;32

Sa mga panahon karon daghan usab ang nisiaw nga mga scams halos sa tanang aspeto sa kinabuhi natong mga tawo. Gikan sa mga produkto, finances ug gani bisan sa relihiyon.  Daghan ang magpaaron nga Katoliko apan dili diay.

Hinuon naay uban nga mora'g katoliko gyud ang misa apan at least nangangkon man sila nga lahi sila sa mga katoliko ug dili pud sila mosulod sa teritoryo nga ila sa mga katoliko.

Apan dunay uban nga mosulod gyud sa teritoryo sa mga Katoliko aron manglingla. Ang mga sakramento nga ilang pagasaulogon imbalido sanglit ang si bisan kinsa nga niordinar kanila wala may gahom nga pinasikad sa apostolic succession.

Nga sa ato pa, kun sila mohimo sama sa mga gimbuhaton sa kaparian nga validly ordained ngadto sa mga katawhan nga matuohon nan, usa kini ka dakong pagpanglingla aron lamang makasapi.

Dugang pa, usa kini ka sala batok sa kamatuoran ug kaangayan. Kamatuoran sanglit dili man tinuod nga sila nakadawat og espirituhanong gahom sa orden.

Kaangayan sanglit ang mga tawo nga nagpaabot sa husto ug legit nga serbisyo ang giilad lamang og atubang. Kun tinuod kitang nahigugma dili kita mohimo og mga lakang nga makapasalaag sa uban.

Kun tinuod kitang nahigugma atong ihatag kun unsay angayan ug dili nato ihikaw sa uban kun unsay angay nilang pagadawaton ug saulogon.