EDITORYAL- Nabuta sa propaganda Nagbinasolay ug nagtinudloay

Na kun si kinsa ang sad-an. Mao kini karon ang nahitabo sa mga nagkadaiyang distrito o probinsya dinhi sa nasud tungod aning pagkasakop ni Presidente Ferdinand Marcos Jr. sa mga iregularidad sa mga flood control projects.

Sa laktod walay gustong moangkon og responsibilidad sa mga nahitabo nga nakaapektar sa mga yanong tawo nga maoy nagbutang kanila sa pwesto.  Kung ingon niini ang kalaki aning mga opisyala, mas maayo pang ang nasudnong kagamhanan mogamit sa tanan niining kahimanan aron pagutingkay sa kamatuoran aning maong eskandalo sa flood control projects.

Walay gustong moangkon sa kasaypanan o kun kasaypanan ba gyud o tinuyoan nga kapalpakan tungod nangahadlok nga silay matugpahan sa atsa diha sa tadtaran.

Kaning kurapsyon sa flood control projects dako kining eskandalo. Kinahanglan nga dunay mataral sa hukmanan ug manubag sa ilang salaod, ang pagpangawat sa kwarta sa katawhan dili para sa lang bulsa sa pipila nga naa sa gahum kondili para sa kaayohan sa tanan. Bilyones ka pesos nga kwarta sa katawhan ang nausik tungod aning mga kawatang opisyales sa gobiyerno.

Apan subo lang gihapon kaayo palandungon kay ang mga tawo nga gikubalan na aning mga balita bahin sa kurapsyon ug panagbangi sa mga politiko, dili nalang sab magpakabana.

Nabuta na sila sa ilang ug nahimong lunod-patay nga tigpaluyo sa mga politiko bugti sa mga tam-is nga pahiyom ug mga bulatik pinakapinan og mainitong lamano ug usa ka bulsitang hinabang.

Mao kini ang  tinuod nga sitwasyon karon sa Pilipinas, ang mga tawo nabutahan sa mga propaganda, nawala na ilang kritikal nga pagpaminsar sa mga isyung dako og epekto sa ilang kinabuhi kay mas pilion nalang nga aduna silay matawag nga kawsa bisan og sayup.

Tinuod gyud kining panultihon nga lisud usbon ang hunahuna sa tawong dili bukas modawat sa kamatuoran o kausaban.