VIP treatment Pagpamalandong

Ang mga Very Important Persons kun VIP’s adto gyud sa piniling dapit sa kumbira.

Ang piniling dapit nahimutang man didto ang mga lamiang mga pagkaon ug ang mga service deluxe nga pangalagad.

Mao tingali nga daghang mga tawo ang nag-apas niini ug daghang mga tawo ang nangindahay niini.

Apan ang atong Ginoo dinhi sa ebanghelyo nato karong Domingoha nipahimangno man nga kun mahimo dili kita mag-apas ning maong dapita kay basin unya sa atong paglingkod sa mga pinasidunggang dapit papahawaon kita sanglit dunay gitagan-an niini ang nagdapit.

Mas praktikal nga magsugod kita sa pinakaubos nga dapit kay kun ikaw makit-an sa nagdapit nimo, mahimo kang mapasidunggan kun paadtoon ikaw sa pinasidunggang mga dapit.

Atong hinumdoman nga ang atong kinabuhi LUMALABAY lamang. Dili maayo mangita og dinagko ug magpataas kay kita mopauli sa abog.

Atong hinumdoman nga ang si bisan kinsa nga magpataas, ipaubos ug ang bisan kinsa nga magpaubos ipataas.