Sinapit nga awhag

Taliwala sa panawagan sa mga netizens kabahin sa mga “luho nga pagkinabuhi” sa mga paryente sa mga kontraktor nga nahilambigit sa kurapsyon, miawhag ang Malacañang sa publiko nga motabang kini sa pagyagyag sa mga anomaliya kabahin sa mga flood-control projects.  Giluod na man gani ang katawhan og hinisgot ni’ng maong kahiwian, patabangon na hinoon pagpangoykoy og ebidensya.  Kon buot huna-hunaon ug kon sinsero pa gyud ang gobyerno, anaa kanila ang gahum ug ang makinaryas sa paghimo’g tinuoray nga imbestigasyon niining maong kahiwian.   Mao kana’y giingon nga, “Inay ang katawhan maoy modangop sa gobyerno, ang gobyerno na man hinoon ang midangop sa tawo!”  Unshalaan!

 Gipabawnan man diay!

Nagpasalamat si kanhi PNP Chief Gen. Nicholas Torre III sa mga supporters dungan ang pag-awhag kanila nga dili siya angay limsan og kaluoy ni’ng pagtaktak kaniya sa katungdanan.  Dugang pa ni Torre, kon aduna man gani angay kaloy-an, sila kadtong mga nabiktima sa pagpunay og baha. Bisan og gitaktak, nagpabilin pa man gihapon nga pulis si Torre.  Labaw pa, dili gyud siya angay kaloy-an kay matud pa sa akong amigo, “Gipalayas lage pero, sama sa naandan, gipadlhan man sad og dakong balon aron dili mapasmo sa biyahe.”  Muleeng!

 Maka-ingon ta’g mirise!

Agi’g tubag sa pangutana kon unsay iyang panahom sa pagkataktak ni Gen, Nicholas Torre III isip hepe sa PNP, namahayag si Bise Presidente Sara Duterte nga dili siya makaingon nga karma na ang nahitabo sa heneral kay ang Diyos lamang ang nasayod kon unsay angayan alang sa usa ka tawo.  Luwas sa intrega ang maong komento sa bise president apan dili nato maseguro kon naha-um ba kini sa iyang gibati.  Kon atong binata-on pagsabot ang pamahayag sa bise presidente, daw miingon siya nga, “Kaluoy sab ni Torre, makaingon man sab ta nga MIRISE.”  Madahaan!

“Tell it to the marines”

Sumala pa ni Deputy Speaker Reynaldo, imposible ang pasangil ni Bise Presidente Sara Duterte nga aduna gihapo’y kurapsyon nga nahitabo sa pagbuhat og mga classrooms ug nga nalambigit og nakabenepisyo usab niini ang mga kongresista.  Matud ni Puno, adunay sistema sa pagpili sa kontraktor nga gipatuman ang DepEd ug nga ang DPWH lang ang nalambigit.  Imposible gyud kaha? Nagtoo tingale si Puno nga kolokoy ang katawhan’g Pilipino nga motuo lang dayon sa iyang pangulipas.  Matud pa bitaw sa panultihon, “Tell it to the marines, nga sa binisaya pa, “Estoryahee!”  Fezteleern!

 Nakatampo ka sa trapik?

Nanawagan ang Cebu City Council alang sa pag-convene sa usa ka Trasportation Summit aron matubag ang “masakiton” nga transport system sa dakbayan ingon man sa ang pagpangita’g paagi nga mahimong moderno kini. Tinuod nga ang trapik sa dakbayan nahimo na’ng inadlaw-adlaw nga silot sa mga commuters.  Sa tinamban nga obserbasyon, ang hinungdan sa trapiko sa dakbayan mao ang gagmay nga dalan og naghinobra nga gidaghanon sa sakyanan.  Haum ang pangutana sa akong amigo nga, “Ngano’ng nagreklamo man ka sa trapik, naa ba diay ka sa kadalanan ug nagdala sab diay ka’g kaugalingon’g sakyananan?”  Pagkatoytoy!