EDITORYAL - Chinese spy network, hulga

Human gibutyag ni Senador Panfilo Lacson ang matud pa presensiya sa mga “sleeper agents” sa China dinhi sa Pilipinas, gipahibalo sa Malacañang nga duna na silay gibuhat aron sa pagpangita ug pagberipika aning maong mga report.

Dunay pagduda ang senador nga dunay espionage network ang China dinhi ug ang uban nilang mga ahente naa karon nagtrabaho sa mga importante o vital nga mga ahensiya sa gobiyerno, apil niini diha mismo sa Palasyo ug sa Commission on Elections.

Seryuso kaayo kini nga hulga dili lang sa gobiyerno o sa militar sa Pilipinas, kondili sa tibuok katawhang Pilipino ug sa kaugmaon niini, ilabi na ang mga kabatang henerasyon. Kun adunay spy network ang China sa sulod mismo sa gobiyerno, peligro kaayo kini ilabi na sa nasudnong seguridad. Tabla ra og gaduwa og baraha unya ang mga tawo sa luyo tigsenyas sa kontra kung unsa ang imong barahang gikuptan.

Kagahapong adlawa, gibasa ni Palace Press Secretary Claire Castro ang pamahayag sa National Security Council (NSC) ang bahin niini.

Wala balewalaa ug giisip gyud sa gobiyerno nga hulga kining maong mga espiya. Sa nanglabay nga mga adlaw, aduna nay mga gipangdudahang operatiba sa China nga nangadakpan. Ning bag-o lang, si Senador Risa Hontiveros mipublikar bahin sa usa ka negosyanteng nagpailang Pilipino nga nakasulod isip miyembro sa Philippine Coast Guard (PCG) Auxiliary.

Apan nasakpan siya nga dili siya tinuod nga usa ka Pilipino kondili usa siya ka Chinese national nga nagpakaaron-ingnong Pilipino.

Ang makapaalarma niini, nahibaw-an nga ang iyang mga credentials o dokumentong gipresentar isip usa ka Pilipino, dili mga peke.

Nagpasabot kini nga gikan gyud sa mga lehitimong ahensiya o departamento sa gobiyerno nagagikan ang iyang mga dokumento.

Nasuta sab nga kining maong mga dokumento, na –release gikan sa mga buhatan sa gobiyerno sa panahon ni kanhi presidente Rodrigo Duterte.

Usa sa mga dili makalimtang espiya nga nasakpan mao ang gi-dismissed nga si Bamban Mayor Alice Guo nga usa diay ka Chinese national nga si Gua Hua Ping, base sa findings sa National Bureau of Investigation.