Basaha: 1 Tes. 2;9-13

Si San Pablo ang nisuporta sa iyang kaugalingon pinaagi sa paghimo og tolda aron siya mabuhi. Tungod niini iyang gipahimangnoan ang mga magtutuo sa maong dapit nga dili sila magpasulabi sa ilang gibati ug mga balansayon, sanglit wala man gani sila nahimong bug-at nga suliran alang kanila. Nagwali sila sa Maayong Balita nga libre ug  sa walay pagpangayo og bayad.

Ingon usab niini ang kaluwasan. Libre ang kaluwasan. Apan atong hinumdoman ang giingon ni San Agustin: “God Created you without you but He cannot save you without you!”

Timailhan lamang kini nga dunay bugti gihapon ang tanan bisan pa man kun pagaisipon nato kini nga usa ka libre.

 Sama sa pangandoy ni Santa Monica nga makabig ang iyang anak nga si Agustin iya unang gipabuhagay ang daghanang mga luha ug tingali nagkasamad samad ang iyang mga tuhod og linuhod aron lamang si Agustin mahibalik ngadto sa Dios.

Ug tuod man nagbunga ang maong pagsakripisyo. Si San Agustin nahibalik ngadto sa Dios ug sa Simbahan ug gani nahimong usa sa mga mahinungdanon kaayong personahe niini.

Atong himoong abli ang atong tanlag ug kasingkasing sa bisan unsang pahimangno gikan sa Dios ug sa iyang Simbahan aron sa atong panaw labina gyud sa mga dulom nga bahin sa atong kinabuhi kita magiyahan ug dili mahisalaag. Ang gasa hinatag nga libre apan sa laing bahin kita adunay katungdanan sa pagpalipang niini.